Türkiyədə Uzunkörpü-İstanbul marşrutu üzrə hərəkət edən qatarın altı vaqonu relsdən çıxaraq aşıb. Sərnişin qatarının qəzaya uğraması nəticəsində 24 nəfər ölüb, 318 nəfər xəsarət alıb. Hadisə zamanı qatarda 362 sərnişin və 6 ekipaj üzvü olub.
İlkin məlumatda 10 nəfərin öldüyü açıqlanmışdı. Lakin baş nazirin köməkçisi Recep Akdağ ölənlərin sayının 24 nəfər olduğunu açıqlayıb. Akdağın sözlərinə görə, qəzada 318 nəfər yaralanıb və onlardan 194-ü ilkin tibbi yardımdan sonra evə buraxılıb. Türkiyənin səhiyyə naziri Ahmet Demircan yaralıların vəziyyətinin qənaətbəxş olduğunu deyib.
Nəqliyyat, dəniz və rabitə naziri Ahmet Arslan isə qəzanın səbəbini açıqlayıb. Vurğulayıb ki, fasiləsiz yağan yağışlar nəticəsində relslərin altındakı torpaq boşalıb. Bu boşalma isə dəmiryolunda relslərin çökməsinə səbəb olub. Nazir bildirib ki, Nəqliyyat, Dəniz və Rabitə Nazirliyinin müşaviri Suat Hayri Akanın sədrliyi ilə böhran mərkəzi yaradılıb.
Ərdoğan: "Qəza hərtərəfli araşdırılacaq”
Prezident Rəcəp Tayyib Ərdoğan Tekirdağda baş verən qatar qəzasından sonra müvafiq dövlət qurumlarının səfərbər olduğunu deyib. Prezident ilk olaraq qəzada həyatını itirənlərin ailələrinə başsağlığı verib, yaxınlarına səbr diləyib: "Gözlənilməz qəza bizi və millətimizi dərindən üzdü. Dünyasını dəyişənlərə Allahdan rəhmət diləyirəm. Yaralı bacı-qardaşlarımıza şəfa diləyirəm. Olay hər detalınadək araşdırılacaq. Buna heç kimin şübhəsi olmasın”.
Qəzada yaralanan vətəndaşın dəhşətli ifadələri...
Vaqonların relsdən çıxaraq aşması nəticəsində ağır yaralanan Ekrem Tuna qatar gedərkən bərk taqqıltı eşitdiyini deyib. Onun sözlərinə görə, səslərdən 4-5 dəqiqə sonra ard-arda 5-6 vaqon relsdən çıxaraq bir neçə dəfə aşıb: "Həyat yoldaşım Mələklə qarşı-qarşıya oturmuşduq. Birdən səslər eşitdik. Yoldaşım "Ekrem, nə baş verir, deyəsən ölürük” dedi. Vaqonların aşması ilə özümü itirdim. Mələk vaqonun altında qaldı və daxili qanaxmadan öldü. O, mələk olub göyə uçdu, mən isə həyatda tək qaldım. Kaş ki, mən də onunla bərabər ölsəydim. Uzunkörpüdə evimiz var idi. Bir günlük ora getmişdik. Geri dönərkən qatarla səyahət etməyi qərarlaşdırdıq. Ancaq bu qərar sonumuz oldu. Mən də ciddi xəsarət aldım, qabırğamda qırıqlar var, başıma tikiş qoyublar”.
İsmayıl
