Ötənlərdə 23 illik tarixə malik və ölkənin ictimai-siyasi həyatında mühüm rol oynayan "Şərq” qəzeti abunə kampaniyasına başlamaq qərarı verib. Məhz bu məqsədlə qəzetin baş redaktoru Akif Aşırlı redaksiyada toplantı keçirərək, klassik qəzet ənənələrinin yaşadılması naminə "Şərq”i oxu” şüarı ilə ictimaiyyət nümayəndələrinə, sadə vətəndaşlara, qəzet oxumaq istəyən hər kəsə müraciət ünvanlayaraq, abunə yazılmaq üçün çağırış edib. Və qəzetin redaksiyasında "Abunə dəftəri” açılıb. Artıq bu çağırışdan sonra sosial mediada, eləcə də ictimaiyyətdə ziyalılar, aydınlar və oxucular "Şərq"ə dəstəklərini ifadə ediblər.
Belə aydınlarımızdan biri də tanınmış yazıçı, alim, media üzrə ekspert Natəvan Dəmirçioğludur. O öz "Facebook" səhifəsində "Şərq"in abunə kampaniyasına dəstəyini belə ifadə edib:
" "Şərq" auditoriyası olan qəzetdir. Üstəlik, bəzən jurnalistika fakültəsinin tələbələrinə bir səhifəlik auditoriya rolunu oynayır. İllər öncə mən də bu kollektivini və özünü dəyərləndirdiyim qəzetdə "DEBÜT" adlı bir rubrika açmışdım,burada jurnalist- tələbələrin ilk götürdüyü praktik müsahibələr yer alırdı. Onun nəşri, auditoriyada müzakirəsi nə qədər dəyərli idi. Mən də "Şərqi oxu" hərəkatına qoşuluram. Zatən, "Şərq" oxuyuram."
Bundan başqa tanınmış publisist Mətbuat Şurasının sədr müavini Müşviq Ələsgərlinin qəzetlərə dəstək təklifinə müsbət reaksiya verib: "Təqdir etməli addım, Müşfiq müəllim! Bu gün səhər -səhər şərqçilərə zəng vurdum,baş redaktor, hamımızın dostu Akif Aşırlı ilə danışdım.5-ci gün redaksiyaya gedəcəyimi və mənim imkanlarım daxilində nə kömək lazımdı etmək istəyində olduğumu dedim.Dəstək lazımdır,maddi,mənəvi"
Qeyd edək ki, "Şərq” qəzetinə abunə olmaq istəyən şəxslər qəzetin Mətbuat prospekti 529-cu məhəllə, "Azərbaycan” Nəşriyyatının 7-ci mərtəbəsində yerləşən redaksiyasına gəlib abunə yazılaraq, öz dəstəyini göstərə bilər. Abunə yazılaraq həm qəzetçiliyin yaşamasına öz töhfənizi verər, həm də ölkədə oxu mədəniyyətinin inkişafına yardımçı olarsınız.
