"Amerika və Türkiyə arasında son baş verən hadisələr iki ölkə arasındakı münasibətləri əsaslı dərəcədə sarsıdır”.
Bunu "Sherg.az”a Türkiyənin xarici işlər naziri Mövlud Çavuşoğlu və ABŞ-ın dövlət katibi Maykl Pompeo arasında keçirilən görüşdən danışarkən "Tolerantlıq” Araşdırmalar birliyinin sədri, siyasi şərhçi Azər Rəşidoğlu bildirib.
O diqqətə çatdırıb ki, Türkiyənin Rusiyadan raket əleyhinə qurğular alması rəsmi Vaşinqtonu narahat edir:
"Bu gün münasibətlərdə böhran yaşanır. Türkiyənin xarici işlər naziri Mövlud Çavuşoğlu iki ölkə arasındakı sanksiya qalmaqalından sonra ABŞ-ın dövlət katibi Maykl Pompeo ilə Sinqapurda ASEAN-a üzv dövlətlərin xarici işlər nazirlərinin toplantısı çərçivəsində ilk dəfə görüşüb. Görüşdən sonra açıqlama verildi ki, tərəflər arasında Suriyadakı vəziyyət, Fətullahçı Terror Təşkilatının (FETÖ) lideri Fətullah Gülənin Türkiyəyə təhvil verilməsi, ABŞ istehsalı olan "F-35” döyüş təyyarələrinin 5-ci nəslinin Türkiyəyə tədarük olunması və amerikalı keşiş Endryu Bransonun mühakiməsi müzakirə edilib. Güman edirəm ki, Fətullah Gülənin təhvil verilməsi kimi müzakirələr sadəcə mətbuat üçün verilən açıqlamalardır. Rusiyadan raket əleyhinə qurğuların alınması və Türkiyədə həbs olunan amerikalı keşişin ətrafında yaranan böhranın necə aradan qaldırılması ABŞ və Türkiyə arasında əsas müzakirə mövzusudur. Bir müddət sonra böhranın aradan qalxacağını istisna etmirəm.
Bütün bunlara baxmayaraq, Türkiyə get-gedə regionda gücə çevrilir, ABŞ-ın for-postu olmaqdan çıxır. Bu cür irəliləyişlərin olması rəsmi Vaşinqtonu narahat etməyə bilməz. Ona görə, düşünürəm ki, belə böhranlar bundan sonra da zaman-zaman gündəmə gələcək”.
Qeyd edək ki, son 15 gün ərzində Çavuşoğlu ilə Pompeo 4 dəfə telefonla danışıb. Tərəflər arasında sonuncu dəfə avqustun 1-də Maykl Pompeonun təşəbbüsü ilə telefon danışığı olub.
Aysel Aslan
