"Qərb aləmində Türkiyə ilə bağlı böyük fikir müxtəlifliyi var”.
Bunu "Sherg.az”a NATO baş katibinin diplomatiya üzrə köməkçisi Taçan İldemin Türkiyə və Avropa İttifaqı (Aİ) əlaqələri ilə bağlı açıqlamalarını izah edərkən politoloq İlqar Vəlizadə deyib.
O bildirib ki, Türkiyənin Aİ ilə əlaqələrinin qurulmasını istəyənlər çoxdur:
"Türkiyə Avropa İttifaqı ilə münasibətləri inkişaf etdirməsə, fərqli məqamlar ortaya çıxa bilər. Aİ və Türkiyə arasında gömrük müqaviləsinin bağlanması haqqında danışıqlar aparılırdı. Lakin Almaniya buna qarşı çıxır, danışıqları dayandırmaq istəyir. Bu isə NATO səviyyəsində və digər sahələrdə çox siyasətçiləri narahat edir. Çünki bu, böyük siyasi və iqtisadi risklərlə bağlı olan məsələdir. Türkiyənin Avropa ilə əlaqələrini dayandırsalar, onda çox ölkələr çətin vəziyyətə düşəcək. Ruminiya, Bolqarıstan, Xorvatiya və s. ölkələrin timsalında bunu dəqiq demək olar. Avropada Türkiyə son illər ərzində aparıcı sahələrə milyardlarla dollar yatırımlar edib. Almaniya isə kifayət qədər qüdrətli və imkanlı ölkədir. Ona görə, belə məsələdə digər ölkələrlə müqayisədə o qədər də zərərdə olmayacaq. İstənilən halda, Almaniyanın özünün Türkiyə ilə 36-40 milyard dollar təşkil edən ticarət dövriyyəsinin azalması böyük itki olacaq.Normal düşüncəli insanlar, reallıqları nəzərə alıb, Avropa-Türkiyə münasibətlərinin bu qədər korlanmasını istəmirlər. Başa düşürlər ki, zərəri böyük olacaq. Türkiyə və Aİ münasibətləri tək iqtisadi əlaqələrə deyil, siyasi müstəvidə də təsirlərini göstərəcək”.
Qeyd edək ki, NATO rəsmisinin sözlərinə görə, Avropa İttifaqı Türkiyənin üzvlüyü məsələsinə ehtiyatla yanaşmalıdır və bu ölkənin heç vaxt Aİ üzvü olmayacağı kimi bəyanatlar verməməlidir.
Aysel Aslan
