Tələbə Qəbulu üzrə Dövlət Komissiyasının (TQDK) sədri Məleykə Abbaszadə rəhbərlik etdiyi qurumun Təhsil Nazirliyinə birləşdirilməsi ilə bağlı mətbuatda yayılan fikirlərə aydınlıq gətirib:
"Ölkədə struktur islahatları aparılır. Lakin TQDK-nin hansı quruma birləşdirilməsi barədə qərar qəbul edilməyib”. O qeyd edib ki, hansı qərar qəbul olunacaqsa, ona tabe olacaqlar: "Üzümü abituriyentlərə, valideynlərə tuturam ki, hər hansı qərar qəbul olunacaqsa, onlar bundan əziyyət çəkməyəcəklər və onların bilikləri obyektiv qiymətləndiriləcək”. Komissiya sədri qeyd edib ki, bu ilin orta məktəb məzunları üçün buraxılış imtahanı ötənilki qayda ilə keçiriləcək, yalnız imtahan nəticələrinin qiymətləndirilməsi dəyişdiriləcək.
Qeyd edək ki, 2016-cı ildə ali təhsil müəssisələrinin magistratura səviyyəsinə və tibb ixtisaslarının rezidentura səviyyəsinə keçiriləcək imtahanların və tədbirlərin plan-qrafiki təsdiqlənib. Ali məktəblərin magistratura səviyyəsinə ərizə qəbulu 10-19 fevral tarixlərində aparılacaq.
İmtahanın birinci mərhələsi 6 martda, ikinci mərhələsi isə 5 iyunda keçiriləcək. Magistraturaya qəbul olunacaq bakalavrların qəbul olduqları təhsil müəssisələrində qeydiyyatı 29 iyun-11 iyul tarixlərində aparılacaq. Boş qalan plan yerlərinə ixtisaslaşma seçimi isə 8-14 avqust tarixlərində aparılacaq. Ali təhsil müəssisələrinin tibb ixtisaslarının rezidentura səviyyəsinin ərizə qəbulu 1-10 mart, qəbul imtahanının birinci mərhələsi 3 aprel, ikinci mərhələsi 29 iyul tarixlərində keçiriləcək. Namizədlərin ixtisaslaşma seçimləri 1-7 avqustda, qəbul olunduqları təhsil müəssisələrində qeydiyyatları 9-15 avqust tarixlərində keçiriləcək. Boş qalan yerlərə ixtisaslaşma seçimi isə 19-22 avqustda aparılacaq.
Şəymən
