Azərbaycan Respublikası Xüsusi Dövlət Mühafizə Xidmətində (XDMX) Azərbaycan Xalq Cümhuriyyətinin yaradılmasının 99 illiyi ilə bağlı tədbir keçirilib.
Sherg.az xəbər verir ki, tədbirdə AXC tədqiqatçıları, BDU-nun professoru, AMEA-nın müxbir üzvü, millət vəkili Musa Qasımlı, "Şərq” qəzetinin baş redaktoru, tarix elmləri üzrə fəlsəfə doktoru Akif Aşırlı, Prezident Yanında Qeyri-Hökumət Təşkilatlarına Dövlət Dəstəyi Şurasının üzvü Emin Həsənli iştirak ediblər.
Tədbiri XDMX-nin Milli Qvardiyanın Şəxsi Heyətlə İş üzrə şöbə rəisi mayor Faiq Abuşov açıb. O, Azərbaycan Xalq Cümhuriyyətinin yaradılmasının 100 illiyinin keçirilməsi ilə bağlı Azərbaycan Respublikasının Prezidenti İlham Əliyevin sərəncamına toxunub və Cümhuriyyətlə bağlı fikirlərini əsgər və zabitlərə çatdırıb.
Sonra çıxış edən millət vəkili Musa Qasımlı mövcud olduğu 23 ay müddətində Azərbaycan Xalq Cümhuriyyətinin gördüyü işlər, həyata keçirdiyi geniş tədbirlər haqqında ətraflı danışıb. Deputat əsgər və zabitlərə Azərbaycan xalqının şərəfli tarixi haqqında qürurla məlumat verib.
"Şərq” qəzetinin baş redaktoru Akif Aşırlı Azərbaycan Xalq Cümhuriyyəti dönəmində ordu quruculuğu haqqında mülahizələrini səsləndirib, Qafqaz İslam Ordusunun 6 aylıq savaşı barəsində ətraflı danışıb. A.Aşırlı aprel savaşlarının 1918-1920-ci illərdə əsası qoyulan Milli Ordumuzun milli vətənpərvərlik ruhunda yetişdirilmiş kadrlarının döyüş qabiliyyətinin bariz nümunəsi olduğunu deyib.
E. Həsənli Azərbaycan Xalq Cümhuriyyəti və son illərdə Azərbaycanda baş verən yeni nailiyyətlər, uğurlar barədə danışıb.
Tədbir iştirakçıları, əsgər və zabitlər yekun olaraq XDMX binası qarşısında, Ümummilli Lider Heydər Əliyevin abidəsi önündə xatirə şəkli çəkdiriblər.
Aysel Aslan
