Yanvarın 1-dən fevralın 6-na qədər olan müddətdə Bakıda 52 yol-nəqliyyat hadisəsi qeydə alınıb.
Bakı şəhər Dövlət Yol Polisi İdarəsinin ictimaiyyətlə əlaqələr bölməsinin rəisi, polis polkovniki Vaqif Əsədovun APA-ya verdiyi məlumata görə, baş vermiş hadisələr nəticəsində 10 nəfər ölüb, 56 nəfər xəsarət alıb. V. Əsədov bildirib ki, ötən ilin müvafiq dövrü ilə müqayisədə baş vermiş qəzalar, ölüm hallarının sayı azalıb.
Bölmə rəisi qəzalara sürət həddinin aşılmasının, təhlükəli manevr etmənin və digər qanun pozuntuların səbəb olduğunu bildirib. V.Əəsədov qeyd edib ki, yol-nəqliyyat hadisələrinin sayının minimuma endirilməsi hərəkət iştirakçılarından asılıdır. O, sürücülərdən və piyadalardan qanunlara əməl etməyi xahiş edib.
V. Əsədov bildirib ki, qeyd olunan müddətdə sərxoş halda avtomobili idarə edən 1564, işıqforun tələbini pozan 1188 sürücü, müəyyən edilməyən yerlərdən keçən 12881 piyada inzibati qaydada məsuliyyətə cəlb olunub.
