Bakı şəhəri, Yasamal rayonu 528-ci məhəllənin yaşayış ərazisinə şlaqbaum çəkilib. Bununla bağlı redaksiyamıza müraciət edən Yasamal rayon sakini Zaur Nəcəfov mövcud vəziyyətdən narazı olduğunu bildirir.
Şikayətçinin sözlərinə görə, avqust ayının 12-dən etibarən yaşadıqları məhəllənin iki girişinin qarşısına şlaqbaum qoyulub: "Bu şlaqbaumlar əhalidən yığılan vəsait hesabına alınıb. O vaxtdan başlayaraq Ələsgər Ələkbərov və Məmməd Rahim küçəsinə baxan girişlər bağlanıb.
Məsələ ilə əlaqədar olaraq bir neçə quruma, Yasamal Rayon İcra Hakimiyyəti, Fövqəladə Hallar Nazirliyi, İqtisadiyyat Nazirliyi, Daxili İşlər Nazirliyinə də müraciət etmişəm, lakin heç bir nəticəsi olmayıb. Bildirdim ki, yollar bağlandığı üçün təcili yardım, FHN maşınları gəlməli olarsa, məhəlləyə daxil ola bilməyəcəklər. İş saatı bitdikdən sonra şlaqbaumların biri açılır. Başqa bir yol var, məhəlləyə nisbətən uzaqdır, avtomobillər o istiqamətdən istifadə etməklə məhəlləyə daxil ola bilər”.
Şikayətçinin sözlərinə görə, Yasamal Rayon İcra Hakimiyyətindən gələn cavab məktubunda bildirilir ki, məhəllə sakinləri kənar maşınların daxil olması və təhlükəsizliyin təmin edilməsi məqsədi ilə öz vəsaitləri hesabına məhəllə girişlərinə şlaqbaumlar quraşdırıb:
"Aidiyyəti qurumlara bildirmişəm ki, inzibati xətalar məcəlləsinin 354-cü maddəsində yazılıb ki, adi vətəndaş şlaqbauma görə 80 manatdan 100 manata, vəzifəli şəxslər 400 manatdan 500 manata, hüquqi şəxslər isə 3000 manatdan 4000 manata qədər cərimə olunur. Lakin hələ də heç bir tədbir görülməyib. Bəzi qurumlar bu məsələyə baxmaq istəmir. Məsələni polisə yönəldirlər”.
Yeganə Bayramova
