Bir müddətdir ki, Gürcüstana buraxılması yasaqlanan "Borçalı” Cəmiyyətinin sədri Zəlimxan Məmmədlinin məlum qadağaya dair işini araşdıran tanınmış hüquqşünas İlqar Altay sözügedən məsələ ilə bağlı Gürcüstan Prezidenti Georgi Marqvelaşviliyə məktubla müraciət edib.
Sənəddə deyilir ki, Gürcüstanda doğulub böyümüş Z.Məmmədlinin doğmalarının yaşadığı ikinci vətəninə girişinə bu ölkənin Daxili İşlər Nazirliyi (DİN) tərəfindən qoyulan qadağa 2 ilə yaxındır davam edir. Və bu hal Azərbaycanda və Gürcüstanın azərbaycanlıların kompakt yaşadığı bölgələrdə ictimai rezonansa səbəb olub. Bundan başqa, iddia olunur ki, məsələ ilə əlaqədar edilən müraciətlərə Gürcüstan DİN-in iki rəsmi cavab sənədi hüquqi baxımdan biri-birini təkzib edir: "Yəni sözügedən qurum qadağaya səbəb kimi Gürcüstanın "xarici və vətəndaşlığı olmayan şəxslərin hüquqi vəziyyəti haqqında” qanunun 11-ci maddəsinin 1-ci bəndinin "e” kiçik bəndi göstərilib. Bu bənddəki maddə isə belədir: "... Əgər həmin şəxsin Gürcüstanda olması Gürcüstan dövlətçiliyinə, ya da ictimai asayişə, digər şəxslərin sağlamlığına, hüquqlarına və qanuni maraqlarının müdafiəsinə təhlükə yaradarsa...” Gürcüstan sərhəd-keçid məntəqəsindən ölkə içinə buraxılmadığı gün, yəni, 19. 02. 2014 tarixdə DİN patrul-polisinin Z.Məmmədliyə verdiyi "Ölkəyə girişə qadağa aktında” isə, tamam başqa bir səbəb göstərilib. Bundan başqa, əgər Z.Məmmədlinin Gürcüstandakı yaşam və fəaliyyətində DİN göstərdiyi əməllər olmuşsa, həmin qanun pozuntu faktları niyə göstərilmir və ona qarşı nə üçün vaxtında yerindəcə lazımi inzibati və ya cinayət təqibi qaydasında tədbirlər görülməyib? Beləliklə, Z.Məmmədlinin Gürcüstana buraxılması qadağasının rəsmi məntiqsiz və izaha uyğun olmayan əsassız iddialar üzərində qurulması ortlığa çıxır. Bu da təbii ki, qadağa qərarının hüquqi yox, siyasi qərəz müstəvisində verilməsinə zəmin yaradır”.
Ayyət Əhməd
