“O cür acınacaqlı vəziyyətin ölkəmizdə yaşanmaması üçün hər bir Azərbaycan vətəndaşı sosial məsafənin qorunmasına, tibbi maskalardan istifadəyə və əllərinin yuyulmasına diqqət yetirməlidir”
Koronavirusa qarşı mübarizə çərçivəsində dövlətimiz tərəfindən epidemiyanın qarşısının alınması ilə bağlı bir sıra mühüm tədbirlər görülüb. Bu sahədə işlər hələ də davam etdirilir. Lakin bəzi vətəndaşlarımızın karantin rejiminin yumşaldılması zamanı laqeydlik və məsuliyyətsizlik nümayiş etdirərək qaydaları pozması
nəticəsində yoluxma sayının artması ölkədə xoşagəlməz hal yaradıb.
Məhz vətəndaşların qaydalara riayət etməməsi nəticəsində vəziyyət yenidən mənfiyə doğru inkişaf etməyə başladı.
COVİD-19-a yoluxma hallarının sayının artması isəç ölkədə yenidən məhdudlaşdırıcı tədbirlərin gücləndirilməsi zərurəti yaratdı.
Bu məqsədlə də Azərbaycanda karantin rejiminin avqustun 1-dək uzadılması barədə qərar qəbul olunub.
Eyni zamanda respublikanın bir sıra şəhər və rayonlarında iki həftəlik,
iyunun 21-i saat 00.00-dan iyulun 5-i saat 06.00-dək ciddi karantin rejimi tətbiq ediləcək.
İndi vətəndaş olaraq cəmiyyət qarşısındakı məsuliyyətimizi dərk edib qaydalara və tövsiyələrə riayət etməklə üzləşdiyimiz bu bəladan xilas olmalıyıq.
![](https://sherg.az/uploads/editor/dd1db4b0a6eaf214ca71fb1cd243d9ec.jpg)
Tibb üzrə fəlsəfə doktoru Yazgül Abdiyeva isə deyib ki, xəstəxanalarda çarpayı sayı və tibbi personal məhdud sayda olduğundan yoluxma müəyyən həddi keçərsə, yeni yoluxan xəstələrin xəstəxanalara yerləşdirilməsi ilə bağlı problemlər yarana bilər. Hətta elə bir vəziyyət yarana bilər ki, səhiyyə sistemi də bu yükü daşıya bilməz:
“Biz Avropa yaşanan hadisələrdən nəticə çıxarmalıyıq. Həmin ölkələrdə xəstələri xəstəxanalarda yerləşdirmək üçün yerlər tapılmırdı. O cür acınacaqlı vəziyyətin ölkəmizdə yaşanmaması üçün hər bir Azərbaycan vətəndaşı sosial məsafənin qorunmasına, tibbi maskalardan istifadəyə və əllərinin yuyulmasına diqqət yetirməlidir. Bu qaydalara əməl etməyən insanların məsuliyyətsiz davranışları səbəbindən ölkədə məhdudlaşdırıcı tədbirlərin gücləndirilməsi, sərt karantin tədbirlərinin tətbiqinə zərurət yaranır".
Mövcud situasiyadan iki həftəlik sərt karantin tədbirlərinin tətbiqinin qaçılmaz olduğunu vurğulayn ekspertin fikrincə, belə tədbirlərin həyata keçirilməsi yoluxma sayı azalana qədər davam etməlidir. Onun sözlərinə görə, məhdudlaşdırıcı tədbirlərin tətbiqini istəmirlərsə, vətəndaşlar qaydalara əməl etməlidirlər. Əks halda dövlət yenidən sərt karantin tədbirlərinim tətbiq etməli olacaq.