“Məsuliyyətli olub qaydalara əməl etsək, karantin daha tez aradan qalxa bilər”
Sabahdan ölkəmizdə çimərliklər açılır. Bu, pandemiyanın bütün dünyada tüğyan etdiyi bir dönəmdə yaxşı haldır. Uzun müddətdir, sosial şəbəkələrdə çimərlik mövsümünün olması, dənizə getməyin vacibliyi barədə fikirlər səsləndirilir. Bildirilir ki, payızda xəstəliyin yeni və daha güclü dalğası gələcək. İnsanlar D vitamini almalıdırlar ki, immun sistemləri qaydasında olsun, virusa müqavimət göstərə bilsinlər. Məhz buna görə də Operativ Qərargah çox ciddi işlər apardı, çimərlikləri qaydaya saldı, insanların rahat istifadəsi üçün şərait yaratdı. İndi açıq havada istirahət etməyimiz üçün tam təhlükəsiz şərait təmin edilib.
“Cimerlik.az” saytı vətəndaşlarımızın təhlükəsiz və sağlam istirahətinin təmin edilməsi üçün istifadəyə verilib. Lazım olan sadəcə gigiyenaya əməl etmək və sosial məsafəni gözləməkdir.
Həkim-psixoterapevt Əli Nağıyev “Sherg.az”a açıqlamasında bildirib ki, hər kəs karantinin yumuşaldımasını müsbət qəbul edir. Çünki iqtisadi baxımdan çətinliklərimiz var. Bu çətinliklər çoxala bilər. Həkim vurğulayıb ki, uzun müddət karantin rejiminin olması əhalinin yaşayış səviyyəsinə mənfi təsir edə bilər:
“Amma dövlətimiz də böyük iqtisadi itkilər verir. Ölkəmiz insan itkisinə yol verməməyə çalışır. Operativ Qərargah gərgin iş rejimində işləyərək çalışır ki, hər bir insan həyatına dəyər verilsin. Ona görə də xəstəliyə yoluxanların və ölənlərin sayını azaltmaq üçün ciddi işlər görülür. Operativ Qərargah bu məsələyə iqtisadi əsaslarla yanaşmır. Bəzən əhali arasında yanlış anlaşılmalar baş verir.
Amma obyektiv yanaşsaq, görərik ki, yalnız indi xəstələrin sayı azalmağa doğru gedir və sağalanların sayı artır. Ona görə də verilən qərar yerindədir. Əlbəttə hər birimiz arzulayırıq ki, karantin rejimindən tezliklə azad olaq.
Amma buna nail olmaq üçün fərdi səviyyədə məsuliyyətli olmalıyıq. Sosial məsafəni qorusaq, maskadan istifadə etsək, sərt tədbirlərə ehtiyac qalmaz. İndi də gec deyil. Məsuliyyətli olub qaydalara əməl etsək, karantin daha tez aradan qalxa bilər.
Xəstəliyinin sayının azalması istiqamətində qərar verilib və yumuşaldılmalar olub. Eyni zamanda xəstəliyin müalicəsində təbii profilaktik tədbirlər nəzərə alınıb. Yəni günəş işığı, dəniz havası və suyunun təsiri nəzərə alınıb. Vətəndaşlar da maksimum diqqətli olmalıdır ki, yoluxmalar çoxalmasın”.
