Tural Abbaslı: "Əks təqdirdə bu ləkə Müdafiə Nazirliyinin üzərində qalacaq"
“Şəhid qardaşının üzr videosu cəmiyyətdə çox böyük ajiotaj yaratdı. Bu da təbiidir. Əslində bu videonu çəkən və yayan adamlar da bilməli idi ki, şəhid qardaşına qarşı edilən bu qanunsuzluq və özbaşınalıq bağışlanmayacaq və üstəlik, ordumuzun adına ləkə gətirəcək”. Bu sözləri AĞ Partiya sədri Tural Abbaslı hadisəylə bağlı “Şərq”ə açıqlamasında deyib.
T.Abbaslının fikrincə, Baş Prokurorluq məsələ ilə bağlı araşdırmalarını iki istiqamət üzrə aparmalıdır. Əvvəlcə bu videonun çəkilməsində və paylaşılmasında marağı və əli olan şəxslər tapılıb məsuliyyətə cəlb olunmalıdır. Həmçinin 6000 manat rüşvət alan şəxslər də mütləq cəzalandırılmalıdır.
T.Abbaslının sözlərinə görə, bu videonun arxasında daha böyük maraqlar var. Fikir versəniz, son 3-4 gün Azərbaycan Ordusunun fədakarlığı, qəhrəmanlığı, verdiyimiz onlarla şəhid, əldə olunan hərbi nailiyyətlər hamısı bu xəbərin fonunda kölgədə qaldı:
“Ölkənin ictimai mühitində, sosial şəbəkələrdə Müdafiə Nazirliyi qəfildən əsas tənqid hədəfinə çevrildi. Demək ki, bu videonun çəkilməsi, ondan öncə səsləndirilən iddialar heç də təsadüfi deyil. Hesab edirəm ki, araşdırma zamanı Baş Prokurorluq bu məsələlərə də diqqət etməlidir. Araşdırmaların uzun-uzadı aparılmasına da gərək yoxdur. Şəhidimizin qardaşıyla söhbət edib, videonun harda, kimlər tərəfindən çəkildiyini öyrənmək nə çətin işdir ki!? Onsuz da artıq videonun kimlər tərəfindən çəkilməsi və necə yayılması hər kəsə bəllidir. Ola bilsin, prokurorluq da bu şəxslərin ifşa olunmasında maraqlı deyil. İctimai qınağı nəzərə alaraq, bir növ gözdən pərdə asmaq üçün hadisəylə bağlı iş açıb, istintaq apardıqlarını bəyan ediblər.
Amma aidiyyəti qurumlar bilməlidir ki, araşdırmaların nəticəsi olaraq cəmiyyəti təmin edəcək faktlar aşkarlanmasa, rüşvət alan şəxslər və şəhid qardaşından üzr istədib onun videosunu çəkib paylaşan qüvvələr məsuliyyətə cəlb olunmadığı təqdirdə bu ləkə Müdafiə Nazirliyinin üzərində qalacaq”.
