Mülki silahın əldə edilməsi proseduru elektronlaşdırılır.
Bu, Milli Məclisin bu gün keçirilən iclasında müzakirəyə çıxarılan “Xidməti və mülki silah haqqında” qanuna təklif edilən dəyişiklikdə əksini tapıb.
Qanuna əsasən, mülki silahı əldə etmək istəyən vətəndaş Azərbaycan Respublikasının müvafiq icra hakimiyyəti orqanına ərizə ilə müraciət etməli və bu orqana sağlamlıq haqqında tibbi arayışı və özünün Azərbaycan Respublikası vətəndaşının şəxsiyyət vəsiqəsini təqdim etməlidir.
Layihəyə əsasən, həmin sənədlərin Elektron Hökumət İnformasiya Sistemi vasitəsilə müvafiq dövlət orqanından (qurumundan) əldə edilməsi mümkün olduqda, həmin sənədlər vətəndaşdan tələb edilməyəcək. Belə sənədlərin Elektron Hökumət İnformasiya Sistemi vasitəsilə əldə edilməsi mümkün olmadığı hallarda onların təqdim edilməsi vətəndaşın razılığı ilə sorğu əsasında müvafiq dövlət orqanından (qurumundan) tələb olunacaq və ya vətəndaş tərəfindən təmin ediləcək.
Qanun layihəsi səsverməyə çıxarılaraq üçüncü oxunuşda qəbul edilib.
Təhlükəsizlik məsələləri üzrə ekspert Rəşad Rza "Sherg.az"a deyib ki, vətəndaşların silah əldə etməsi şəffaflaşdırılır:
“Çünki artıq onlayn rejimə keçirilir. Onlayn olduğu zaman hər şey şəffaf olacaq. Yəni 18 yaşına çatmış, sağlamlığı yerində olan, cinayət məsuliyyətinə cəlb olunmamış insanlar silah almaq hüququ qazanacaq. Amma bəzən neqativ hallar baş verir. Lakin artıq onlayn olduğu zaman şəffaf. Çünki hər kəs sistemdə olacaq. Bu cür məncə daha yaxşıdır. Ümumiyyətlə məsələnin elektronlaşdırılması müəyyən neqativ halların qabağını almağı asanlaşdırılır. Bundan sonra yalnız kimin hüququ çatırsa, həmin şərtlər əsasında silah götürə bilər. Bəzi adamlar var idi ki, müəyyən yollarla arayış əldə edərək silah əldə edirdi. İndi isə həmin şəxslərin qarşısı alınacaq”.
