Ekspert vurğulayıb ki, avtobus zolaqlarının qorunması da sərnişin artımında mühüm amildir
Bu ilin yanvar - avqust aylarında avtobuslardan istifadə edən sərnişinlərin sayında artım müşahidə olunub. 1 milyard 154 milyon 140,3 min sərnişinin avtobusları seçməsi ötən ilin eyni dövrü ilə müqayisədə 6,3 faiz artımı göstərir. Bu da sərnişinlərin nəqliyyat seçimində müəyyən dəyişikliklər olduğunu ortaya qoyur. Statistikaya baxdıqda, taksidən istifadə cüzi artım göstərsə də (0,4 faiz), avtobuslara marağın sürətlə artması ictimai nəqliyyatın daha əlverişli və sərfəli seçim olaraq ön plana çıxdığını nümayiş etdirir. Eyni zamanda, avtomobil nəqliyyatında 6 faiz artım müşahidə olunsa da, sərnişinlərin böyük hissəsinin avtobuslardan istifadə etməsi, şəhər nəqliyyatının gələcəkdə daha balanslı və səmərəli planlaşdırılması baxımından vacib göstəricidir.
Nəqliyyat eksperti İlqar Hüseynli Sherg.az-a açıqlamasında bildirib ki, ötən ildən etibarən taksi qiymətlərinin artması sərnişin axınını marşrut avtobuslarına yönəldib:
“Qiymət faktorunun yanında, taksi xidmətlərinin azalması da avtobuslardan istifadəni təşviq edən vacib amildir. Sərnişinlər üçün taksi və avtobus arasında seçimin maliyyə tərəfi daha önəmli rol oynamağa başlayıb. Eyni zamanda, şəhər nəqliyyatının sıxlığı və tıxaclar sərnişinləri ictimai nəqliyyata yönəldir; insanlar fərdi avtomobil və taksi ilə vaxt itkisini nəzərə alaraq, daha səmərəli və sərfəli variant olan avtobuslardan istifadə etməyə üstünlük verirlər”.
Ekspert vurğulayıb ki, avtobus zolaqlarının qorunması da sərnişin artımında mühüm amildir:
“Avtomobil sürücülərinin avtobus zolaqlarına hörmət etməsi və onları boş saxlaması hər gün marşrut avtobuslarından istifadə edənlərin rahatlığını artırır, sərnişinləri alternativ nəqliyyat vasitələrinə yönəlməkdən çəkindirir. Bu, şəhər nəqliyyatında balansın dəyişməsinə və avtobusların sərnişindaşımadakı payının artmasına səbəb olur”.
