"İslama qarşı mübarizə əks effekt verəcək"
Son zamanlar Avropada, İsveç və Danimarkada islamafobların təşkilatçılığı ilə ard-arda Quran nüsxələri yandırılmaqdadır. Təəssüf doğuran hal odur ki, bütün bu çirkin hərəkətlər ölkə rəhbərliklərinin icazəsi və hüquq-mühafizə orqanlarının müdafiəsi altında həyata keçirilir. İsveçin paytaxtı Stokholm şəhərində Quranın yandırılması üçün növbəti aksiyaya da icazə verilib. Avqustun 14-də baş tutacaq vandalizm aktının təşkilatçısı İraqdan olan mühacir Salvan Najemdir. Qeyd edək ki, o, əvvəllər həmyerlisi Salvan Momika ilə birlikdə oxşar hərəkətlər edib. Najem bu mənfur əməlini yenə parlament binası qarşısında yerinə yetirmək niyyətindədir. Ondan öncə İran əsilli 47 yaşlı Marian Bayram İsveçdə Malaren gölünün sahilində manqalda Quranı yandırıb. Bu aksiya zamanı bütün dinlərin məhv edilməsinin vacibliyini bəyan edib. Ekspertlərin fikrincə, İsveç və Danimarkada Quranın yandırılması, islamafob “aksiya”nın hökuməti icazəsi və polis mühafizəsi altında keçirilməsi Qərb dövlətlərinin dini dözümsüzlük və ikili standartlarının təzahürüdür.
İlahiyyatçı Hacı Atif İsmayılov "Sherg.az"a açıqlamasında bildirib ki, Qərb ölkələrində bu kimi halların intensiv hal alması və dövlət qurumlarının təxribata şərait yaratması xristian dünyasının müsəlman aləminin güclənməsindən qorxması ilə bağlıdır. Ekspert vurğulayıb ki, Quranın yandırılması aksiyasının digər səbəbi də müsəlmanlara qarşı ayrı-seçkilik və açıq düşmənçilik edilməsidir:
"Problem ondadır ki, bəzi dövlətlər əslində özləri buna şərait yaratmaqla birbaşa təxribatın iştirakçısına çevrilirlər. Əfsuslar olsun ki, özlərini öncəki "səmavi dinlərin daşıyıcıları" hesab edən bəzi əcnəbilər də Quranın ilahi kitab olmadığını iddia edir, islam düşmənlərinə dəstək verirlər. "İnsanlar öz fikirlərini ifadə etməkdə azaddırlar" kimi şüarlar altında başqa dinin müqəddəslərinə hörmətsiz yanaşmaq, insanların inancını təhqir etmək yolverilməz və təhlükəlidir. Dini kitabı yandırmaq "ifadə azadlığı" deyil, milyardlarla insanı hiddətləndirməkdir. Şübhəsiz, bunlar məqsədyönlü şəkildə həyata keçirilir. Avropa ölkəsindəki müsəlmanları provakasiyaya təhrik edirlər. Amma buna nail ola bilməyəcəklər. Hətta bir qrup müsəlman belə qərara gəliblər ki, Quran yandırılan ərazinin ətrafında öz vəsaitləri hesabına məscid inşa etsinlər. İslama qarşı mübarizə əks effekt verəcək. "Qurani Kərim"də buyurulur: "Onlar Allahın nurunu söndürməyə çalışsalar da, Allah öz nurunu tamamlayacaq". Heç kimin şübhəsi olmasın, sonda zəfər islamın və müsəlmanların olacaq".
