Fevralın 3-də Yasamalda yaşadığı evdə tək qalıb eyvanda ağlayaraq qışqıran uşaqla bağlı məlumat vermişdik. Sözügedən hadisə ilə bağlı aparılan araşdırma barədə yeni məlumatlar var.
Ailə, Qadın və Uşaq Problemləri üzrə Dövlət Komitəsindən Oxu.Az-ın sorğusuna cavab olaraq bildirilib ki, komitə tərəfindən nəzarətsiz qalaraq təhlükəli vəziyyətə düşən azyaşlının hüquqlarının müdafiəsi və maraqlarının təmin olunması, eyni zamandan ailəyə dəstək göstərilməsi məqsədilə müvafiq tədbirlər davam etdirilir.
“Növbəti tədbir olaraq, Yasamal rayonunda yerləşən özəl müəssisələrin birinin təşəbbüsü əsasında Dövlət Komitəsinin nümayəndəsi uşağın anası və ailəyə dəstək göstərən E.İbrahimova (qonşu) ilə birlikdə həmin müəssisəyə səfər edib və azyaşlının məktəbəqədər təhsilə cəlb edilməsi təmin edilib”.
