“Ölkə ərazisindən soyuq hava kütləsinin keçməsi nəticəsində hava şəraiti ötən günlərə nisbətən kəskin dəyişib”.
Bunu Oxu.Az-a açıqlamasında Ekologiya və Təbii Sərvətlər Nazirliyinin Milli Hidrometeorologiya Xidmətinin rəisi Umayra Tağıyeva bildirib.
Onun sözlərinə görə, havanın temperaturu 10 dərəcəyə kimi aşağı enib:
“Bir sıra rayonlarda, Bakı və Abşeron yarımadasında küləyin maksimal sürəti 25-28 m/s-ə çatıb. Respublikanın dağlıq və dağətəyi rayonlarında, Zaqatala, Şəki və Balakən rayonlarında intensiv leysan xarakterli yağışlar yağıb.
Düşən yağıntının miqdarı 16 millimetrə yaxın olub. Nəticədə bölgədən axan Talaçaydan qısa müddətli selin keçməsi qeydə alınıb”.
Xidmət rəisi qeyd edib ki, fasilələrlə yağıntılı hava şəraiti yaxın iki-üç gün davam edəcək:
“Sentyabrın 7-də respublikanın bəzi rayonlarında leysan xarakterli yağışın davam etməsi proqnozlaşdırılır. Buna görə çaylarda sululuq artacaq və qısa müddətli sel keçə bilər. Yüksək dağlıq ərazilərdə hətta qarın yağması istisna olunmur. Bu prosesi gecə saatlarında müşahidə edəcəyik”.
“Bakı və Abşeron yarımadasında yaxın günlər ərazisində hava sərin olacaq. Havanın temperaturu 24 dərəcəyə yaxın olacaq”, - deyə o əlavə edib.
