Türkiyədə küçə itləriylə mübarizədə yeni qaydaların tətbiq ediləcəyi gözlənilir. “Sherg.az” “NTV.com.tr”yə istinadən bildirir ki, Türkiyənin hakim AK partiyası küçə heyvanları – sahibsiz itlərlə bağlı yeni qanun layihəsi üzərində hazırlıqları başa çatdlırıb. Layihə yaxın günlərdə baxılmaq üçün Türkiyə Böyük Millət Məclisinə göndəriləcək.
AKP-nin yeni qaydaların hazırlanmasında dünya təcrübəsinə istinad etdiyi açıqlanıb. Bu modellərdən biri də İngiltərə modelidir. Yeni qaydalara əsasən küçə heyvanları ilə bağlı İngiltərə modelinə bənzər bir üsul təklif edilir. Küçə heyvanlarının əvvəlcə sahibləndirilməsinə çalışılacaq. Bunun üçün 30 gün müddət təyin ediləcək. Bu müddət ərzində sahiblənilməyən küçə itləri yatırdılacaq. Hər bələdiyyə öz ərazisində olan heyvan sığınacaqlarındakı itlərin fotosunu internet səhifəsinə yerləşdirəcək və sahiblənmə elanı verəcək. İtlərin sahiblənməsi üçün 30 gün müddət veriləcək. Bu müddət ərzində sahiblənilməyən itlərsə xüsusi iynələr vasitəsiylə yatırdılacaq. AKP qaynaqları heyvanlara əziyyət edilməyəcəyini, isitfadə olunan iynələrin acısız, ağrısız olacağını bəyan edib. Yatırdılan köpəklərin yerinə sığınacaqlara küçədən toplanan başqa itlər yerləşdiriləcək. Sahiblənilən itlərə isə çip taxılacaq. Sığınacaqdan alınan itlərlə necə davranıldığına davamlı nəzarət ediləcək. AKP qaynaqları bu üsulun həyata keçiriiməsinə zərurət yarandığını, küçə itləri ilə bağlı vətəndaşlardan çoxsaylı şikayətlər gəldiyini açıqlayıb. Bildirilib ki, qısırlaşdırma, sığınacağa yerləşdirmə ilə küçə itləri problemini həll etmək mümkün deyil. Ona görə də itlərin yatırdılması ən uyğun üsul hesab edilir. Lakin AKP qaynaqlarından verilən açıqlamada “yatırdılmış itlərin yerinə sığınacağa küçədən toplana başqa itlər yerləşdiriləcək” ifadəsi, “yatırdılacaq – uyudulacaq” ifadələrinin əslində, iynə vurulmaqla itlərin öldürüləcəyi anlamı verir. Sığınacaq konveyer üsulu ilə işləyir ki bir tərəfdən itlər uyudulsun, harasa aparılsın, sonra onların yerinə başqa itlər gətirilsin, əvvəlkilər “oyanandan” sonra yenidən sığınacağa gətirllsin, bir də uyudulsun. Sadəcə, AKP yetkililəri “küçə itlərini incə bir şəkildə məhv edəcəyik”, söyləmir, “uyudacağıq” deyir.
