“Deyilənlərdən dərs almayanlar, əlbəttə, cəzalanır, tutduqları vəzifədən kənarlaşdırılırlar”
“Bir şüarımız var: kamil vətəndaş, sivil cəmiyyət və güclü dövlət”
Ölkədə korrupsiyaya qarşı mübarizə gücləndirilir. Son vaxtlar həyata keçirilən tədbirlər,o cümlədən kadr islahatları bunun bariz nümunəsidir. Həyata keçirilən dərin islahatlar kursu ölkənin sosial, iqtisadi, siyasi, ictimai, mədəni həyatını əhatə edir, şəffaf və ədalətli idarəçilik sisteminin daha da gücləndirilməsini, vətəndaş məmnunluğunun təmin edilməsini başlıca vəzifələrdən biri kimi qarşıya qoyur.
Azərbaycanın korrupsiyaya qarşı mübarizə təcrübəsi sistemli, hərtərəfli və innovativ xarakter daşıyır. Korrupsiya ilə mübarizə sahəsində müvafiq proqramlar, qanunvericilik aktları qəbul edilir. Görülən bütün bu işlər isə öz bəhrəsini verir.
Azərbaycan Milli Qeyri-Hökumət Təşkilatları Forumunun prezidenti Rauf Zeyni bu barədə “Sherg.az”a danışıb. O, görülən işləri yüksək qiymətləndirib:
“Cənab Prezident İlham Əliyevin hakimiyyəti dövründə korrupsiyaya, rüşvətxorluğa qarşı mübarizə həmişə prioritet istiqamətlərdən olub. Bunu müxtəlif vaxtlarda imzalanan sərəncamlar, fərmanlar və digər sənədlər də təsdiqləyir.
Həmçinin korrupsiyaya qarşı mübarizə dövlət komissiyasınn yaradılması, bu istiqamətdə xüsusi dövlət proqramının hazırlanması, ASAN xidmət kimi ölkənin brendinə çevrilən ciddi bir layihənin irəli sürülməsi məhz rüşvətxorluğa, bürokratiyaya qarşı mübarizə məqsədlidir.
Prezident, demək olar, bütün çıxışlarında şəffaflığın təmin olunması, ictimai nəzarətin yaradılması, məmurların vətəndaşlara layiqli xidmət göstərmələri barədə çıxışlar edir. Dünya dövlətləri də Azərbaycanda həyata keçirilən işləri görür və təqdir edirlər”.
R.Zeyni, həmçinin deyib ki, korrupsiyaya qarşı mübarizə ölkənin dayaqlarını daha da gücləndirir:
“Deyilənləri anlamayanlar, dərs almayanlar, əlbəttə, cəzalanır, tutduqları vəzifədən kənarlaşdırılırlar. Biz vətəndaş cəmiyyəti olaraq bəzi məsələləri qabartmağın əleyhinəyik. Problemləri maarifçilik yolu ilə həll etməyə çalışırıq.
Çünki Azərbaycanda baş verən hadisələri müxtəlif dünya ölkələrindən də izləyirlər. Amma kreslosundan sui-istifadə edib korrupsiyadan əl çəkməyənlər mütləq cəzalanmalıdırlar.
Çünki bu, ölkənin təhlükəsizliyi məsələsidir. Bizim bir şüarımız var: “kamil vətəndaş, sivil cəmiyyət və güclü dövlət”. Ona görə Prezidentin apardığı islahatlara mane olanlar qarşılarında vətəndaş cəmiyyətini, Azərbaycan Milli Qeyri-Hökumət Təşkilatları Forumunu görəcəklər”.
