Azərbaycan Respublikasının İnsan hüquqları üzrə müvəkkilinin (Ombudsman) səlahiyyətləri artırılıb. Prezident İlham Əliyev “Azərbaycan Respublikasının İnsan hüquqları üzrə müvəkkili (ombudsman) haqqında” Azərbaycan Respublikasının Konstitusiya Qanununda dəyişiklik edilməsi barədə Konstitusiya Qanununu təsdiqləyib.
Sənədə əsasən, müvəkkil “Əlilliyi olan şəxslərin hüquqları haqqında” Konvensiyanın və “Uşaq hüquqları haqqında” Konvensiyanın həyata keçirilməsinin, bərabərlik hüququnun təmin edilməsinin və ayrı-seçkiliyin qarşısının alınmasının monitorinqi və təşviqi üzrə müstəqil monitorinq mexanizminin funksiyalarını həyata keçirə biləcək.
Həmçinin müvəkkil insan hüquqları sahəsində dövlət proqramlarının, strategiyaların, milli fəaliyyət planlarının və konsepsiyaların icrası prosesinin təhlilini apara, rəy və təkliflərini müvafiq sahədə monitorinq və qiymətləndirməni həyata keçirən quruma təqdim edə bilər. Qanuna əsasən, müvəkkilin səlahiyyətlərinin bitməsinə 30 gün qalmış Azərbaycan Prezidenti Milli Məclisə yeni müvəkkilin seçilməsi üçün üç şəxsin namizədliyini təqdim edir. Milli Məclis 15 gün müddətində müvəkkilin seçilməsi ilə bağlı müvafiq qərar qəbul edəcək.
Eyni zamanda müvəkkil şikayətə baxılması ilə bağlı görülmüş tədbirlər və nəticələr barədə 10 iş günü müddətində ərizəçiyə yazılı surətdə məlumat verməlidir. Əvvəlki qanunda bu, 5 iş günü idi.
Bundan başqa, müvəkkil informasiya əldə etmək hüququnun pozulmasına dair şikayətə baxarkən informasiya sahiblərindən zəruri məlumatları (sənədləri, materialları) və ya onların surətlərini tələb edə bilər. Həmin məlumatlar (sənədlər, materiallar) 5 iş günü müddətində müvəkkilə təqdim edilməlidir.
Obudsmanın səlahiyyətlərinin artırılmasını yüksək qiymətləndirdiyini söyləyən Beynəlxalq İnsan Hüquqları Cəmiyyəti Azərbaycan Milli Bölməsinin rəhbəri Səadət Bənənyarlı "Sherg.az"a vurğulayıb ki, əsas məsələ bundan doğru istifadə edərək vətəndaşlarımızın hüquqlarını qorumaqdır:
"Ümumiyyətlə hesab edirəm ki, bizim hazırkı ombudsman Səbinə xanım çox böyük işlər görüb. Həmçinin onun atdığı addımlar beynəlxalq ombudsmanların arasında kifayət qədər yüksək qiymətləndirilir. Bilirsiz ki, mən həm də Ədliyyə Nazirliyi yanında ictimai şuranın sədriyəm və biz orada olanda məhkumların ombusdmana ünvanladıqları müraciətlərin cavabını alırlar. Bu isə vacib məsələdir. Ona görə də cənab Prezident tərəfindən ombudsmanın səlahiyyətlərinin artırılmasını yüksək addım kimi dəyərləndirirəm. Çünki bu obyektiv olaraq vətəndaşlarımızın hüquqlarının qorunmasında mühüm rol oynayacaq".
