Gürcüstan Prezidenti ölkənin daxili və xarici siyasət vəziyyətini həm keçmiş partnyorlarına, həm də gürcü xalqına izah etməlidir
ABŞ-ın yeni administrasiyasının Gürcüstana qarşı ədalətsiz münasibəti dəyişəcəyinə, Trampın gəlişinin Aİ-Gürcüstan münasibətlərinə öz təsirini göstərəcəyinə ümid edirik.
Bunu Gürcüstan Prezidenti Mixail Kavelaşvili Fransa radiosuna müsahibəsində deyib.
“Ümid edirik ki, onun gəlişi Aİ-nin Gürcüstanla münasibətlərinə təsir göstərəcək. Bəzi liberal liderlərin indi Trampa necə uyğunlaşmağa çalışması gülməlidir. Gürcüstana bu təzyiqlər Ukraynada müharibə başlayandan sonra başlayıb. Gürcü xalqı öz müdrikliyi ilə sülhü qorumaq üçün seçdiyimiz bu yolda bizə dəstək oldu. Bu gün bizim mövqeyimiz aydındır: Ukraynada bu müharibə bitməlidir. Biz müharibədən əvvəl də deyirdik ki, bu, ölkə üçün dağıdıcı müharibə olacaq və onu dayandırmaq lazımdır. Bu gün Tramp da eyni sözləri deyir, amma biz bunu onun mövqeyini bölüşmək üçün yox, müharibənin ilk günündən bəyan edirik. Bizi sanksiyalara qoşulmağa, könüllülər göndərməyə və müharibəni dəstəkləməyə çağırdılar, baxmayaraq ki, biz nə NATO-nun, nə də Avropa Birliyinin üzvüyük. Ərazimizin 20 faizi işğal olunub. Bizi vədlərlə nüvə ölkəsinin qarşısında tək qoymuşdular. Gənc Avropapərəstlər Rusiyaya qarşı müharibəyə çağırırdılar. Tarix bir gün qəbul edəcək ki, biz Gürcüstanı xilas etmişik”, - Kavelaşvili bildirib.
Politoloq Turab Rzayev "Sherg.az"a söyləyib ki, Gürcüstan Prezidentinin fikirlərində 2008-ci il müharibəsi zamanı Saakaşvilinin səhvlərinə işarə edilir:
"Həmin vaxt Rusiyanın yenidən Gürcüstana daxil olmasına, Abxaziya və Cənubi Asetiyanı birbaşa ilhaq etməsinə aparan prosesə start verdi. Eyni zamanda Saakaşvili bununla bəlkə də öz hakimiyyətinin sonunu gətirdi. Yəni müharibə faktlarının açılması, problemlərin üzə çıxmasından sonra Qərbin onu müdafiə etməməsi Rusiyanın hətta Tiflisə qədər irəliləməsi ilə nəticələndi. Kavelaşvili demək istəyir ki, biz bu səhvləri təkrarlamadıq. Həmçinin davam etdirsəydik, yenə də nüvə dövləti olan Rusiya ilə təkbətək qala bilərdik. Çünki Qərb bizi qorumayacaqdı. Necə ki hazırda Ukraynanı qeyri-tam müdafiə edir. Digər tərəfdən Gürcüstan Prezidenti ölkəsinin yeni siyasi konturlarını, yəni, Rusiya və Çinlə yaxınlaşmaq, Qərbə məsafə qoymaq planını göstərir".
Politoloq vurğulayıb ki, artıq Rusiya-Gürcüstan münaqişəsi keçmişdə qalıb. Hazırda bunun təkrarlanması ehtimalı azdır:
"Buna görə də Gürcüstan hakimiyyətinin Rusiya ilə yaxınlaşması ölkənin ərazi bütövlüyü problemini həll etmir. Kremlin nə Cənubi Asetiyanı, nə də Abxaziyanı Gürcüstana qaytarmaq fikri yoxdur. Həmçinin bu gün Rusiya elə bir siyasi-iqtisadi, mənəvi və maliyyə vəziyyətində deyil ki, bu ölkəyə hücum edəcəyi real görünsün. Ümumiyyətlə Kavelaşvilinin söylədiklərini həqiqət hesab etmək olar. O, ölkənin daxili və xarici siyasət vəziyyətini həm keçmiş partnyorlarına, həm də gürcü xalqına izah etməlidir".
