Bu, Azərbaycanın Cənubi Qafqazda həyata keçirdiyi siyasəti və geosiyasi imkanlarını genişləndirir
"Azərbaycan dövlət başçısının Gürcüstan-Rusiya və Ukrayna-Rusiya arasında vasitəçilik missiyasını həyata keçirməsi istisna deyil".
Bu sözləri "Sherg.az"a açıqlamasında politoloq Məhəmməd Əsədullazadə deyib.
Analitik vurğulayıb ki, Gürcüstan hökuməti Qərbdən uzaqlaşmaq siyasəti fonunda Rusiya ilə danışıqlara gedir. Abxaziya və Cənubi Osetiyaya nəzarəti təmin etmək üçün rəsmi Bakının imkanlarından istifadə edir:
"Gürcüstanda "Xarici agentlər haqqında" qanunun qəbulundan sonra, Qərbin Gürcüstana siyasəti 360 dərəcə dəyişib. Rəsmi Tbilisidə bu əlaqələrin böhrana yuvarlanmasında narahat deyil. Gələn ay keçiriləcək seçkilərdə "Gürcü arzusu" Partiyasi qələbə əldə etdikdən sonra, Abxaziya və Cənubi Osetiya ilə bağlı ciddi addımlar ata bilər. Xüsusilə, Prezident İlham Əliyev Tbilisi və Moskva arasında ortaq məxrəcə gəlməsində əsas vasitəçidir. Ötən ay Rusiya Prezidenti Vladimir Putinin Bakıya səfərində Azərbaycanın bu məsələdə vasitəçi olması ilə bağlı məsələlərin müzakirəsi mümkün idi".
Siyasi şərhçinin fikrincə, Azərbaycan Gürcüstan ilə Rusiya arasında vasitəçilik missiyası həyata keçirəcəksə, Abxaziya və Cənubi Osetiyaya bağlı müsbət irəliləyişlər əldə oluna bilər:
"Təkcə Gürcüstanla bağlı deyil, Ukrayna-Rusiya arasında da Azərbaycan rəhbərliyinin vasitəçilik missiyası var. Ötən gün Ukrayna Prezidenti V.Zelenski tatar əsirlərin qaytarılması istiqamətində Azərbaycanın vasitəçiliyindən istifadə edildiyini qeyd etdi. Göründüyü kimi, Azərbaycanla Rusiya arasında normal əlaqələr Ukrayna və Gürcüstanla Rusiya arasında vasitəçilik missiyasının həyata keçirilməsinə gətirib çıxarır. Təbii ki, bu, Azərbaycanın Cənubi Qafqazda həyata keçirdiyi siyasəti və geosiyasi imkanlarını genişləndirir. Ukrayna və Rusiya arasında humanitar sahədə vasitəçilik missiyası növbəti mərhələdə siyasi vasitəçiliyə çevrilə bilər".
