Ermənistan hökuməti 10 noyabr 2020-ci il üçtərəfli bəyanatına qayıtmaq məsələsini nəzərdən keçirmir.
Bunu Ermənistanın Təhlükəsizlik Şurasının katibi Armen Qriqoryan deyib.
O deyib ki, sənədin 8 bəndi icra edilmədiyi üçün 9-cu bənd səbəbindən həmin sənədə qayıtmaq təəccüb doğurur:
“İrəvan öz imzasından ona görə imtina etmir ki, hazırda sənədin kənarda qalan hər hansı müddəası mövcud deyil və bu reallıqdır”.
Qriqoryan həmçinin ölkənin Konstitusiyasının yeni mətnindən 1990-cı ildə qəbul edilmiş Müstəqillik Bəyannaməsinin çıxarılmayacağı barədə xəbəri təsdiqləməkdən imtina edib.
Milli Məclisin deputatı Aydın Hüseynov "Sherg.az"a bildirib ki, Ermənistanın 2020-ci il 10 noyabr bəyanatından sonra üzərinə götürdüyü öhdəliklərdən biri də Naxçıvana gedən Zəngəzur dəhlizinin açılması idi:
"Ermənistan Konstitusiyasında Azərbaycana qarşı olan iddiaları dəyişmək üçün addımlar atmayıb. Həmçinin qalib dövlət olaraq yalnız Azərbaycan regionda sabitliyi, sülhü və əmin-amanlığın tərəfdarıdır. Buna görə də rəsmi İrəvana bu günkü reallıqları əks etdirən, beynəlxalq hüquqlara söykənən təkliflər irəli sürüb. Lakin Ermənistan bütün bunlara qarşı biganə qalmağa davam edir. Eyni zamanda Fransa, Hindistan və digər ölkələrdən müasir hərbi-texniki silahlanmanı həyata keçirir, o cümlədən revanşist fikirlər səsləndirir. Nikol Paşinyanın başqa ölkələr tərəfindən idarə edilməsi və siyasi alət olduğu məlumdur".
Deputatın fikrincə, Azərbaycan öz ordusunu daha da qüvvətləndirməlidir və bu istiqamətdə işlər görülür:
"2025-ci ilin büdcəsində ölkənin ordusunun və müdafiə qüdrətinin artırılması, sərhədlərimizin etibarlı şəkildə müdafiəsi üçün 4,8 milyard manat vəsait nəzərdə tutulub. Azərbaycanın ən böyük istəyi Naxçıvanla quru yolla gediş-gəlişi təmin edə bilmək, yəni Zəngəzur dəhlizinin açılmasıdır. Bu, dövlətimizin haqlı tələbidir. Ümumiyyətlə Ermənistan iqtisadiyyatı getdikcə çökür. Buna görə də əsas çıxış yolu Azərbaycanın irəli sürdüyü layihələrdə iştirak etmək, kommunikasiyaları açmaq və beynindən revanşist fikirləri çıxarmaqdır".
