Latviya hakimiyyəti Rusiya və Belarus vətəndaşları üçün ölkəyə giriş və vizaların verilməsinə qoyulan məhdudiyyətlərinin müddətini 2026-cı il dekabrın 31-dək uzadıb.
“Report” xəbər verir ki, bu barədə Latviya dövlət teleradiosu olan “LSM”in portalı məlumat yayıb.
Müvafiq qərar fevralın 25-də Latviya Nazirlər Kabinetinin iclasında razılaşdırılıb.
Qeyd olunub ki, viza üçün müraciətlər hələ də Latviya və Avropa İttifaqı vətəndaşlarının ailə üzvləri, Latviya və Aİ ölkələrinin yaşayış icazəsi və uzunmüddətli viza sahibləri, habelə girişi humanitar əsaslarla şərtlənən şəxslər tərəfindən verilə bilər.
Xatırladaq ki, ruslar üçün giriş məhdudiyyətləri eyni vaxtda Latviya, Estoniya, Litva və Polşada 2022-ci ilin sentyabrında qüvvəyə minib. Sonra Latviya hakimiyyəti qərarın müddətini 2025-ci il martın 4-dək uzadıb.
