Təşkilat birtərəfli qaydada ermənilərə xidmət edir və neytrallığını qorumurdu
“Azərbaycan hökuməti Beynəlxalq Qızıl Xaç Komitəsinin Azərbaycandakı nümayəndəliyini bağlamaq niyyəti haqda bizə məlumat verib”. Bunu Beynəlxalq Qızıl Xaç Komitəsinin ictimaiyyətlə əlaqələr mütəxəssisi Aurelie Lachant deyib. O bildirib ki, hazırda hakimiyyət orqanları ilə əlaqə saxlayırlar: “Bu, bizim konfidensial və ikitərəfli dialoqumuzun bir hissəsidir”. APA-nın xəbərinə görə, rəsmi Bakı BMT-nin dörd ofisinin - BMT-nin İnkişaf Proqramı (UNDP), BMT-nin Əhali Fondu (UNFPA), BMT-nin Qaçqınlar üzrə Ali Komissarlığının (UNHCR) və BMT-nin Uşaq Fondunun (UNICEF) Azərbaycanda ofislərinin bağlanması təklifi ilə çıxış edib. Eyni zamanda Azərbaycan hökuməti Beynəlxalq Qızıl Xaç Komitəsinə (BQXK) də Azərbaycandakı nümayəndəliyin bağlanması barədə bildiriş göndərib. Bildirilib ki, bu, beynəlxalq təşkilatlarla əməkdaşlığın dayandırılması demək deyil. Azərbaycan əməkdaşlığı beynəlxalq təşkilatların regional və baş ofisləri ilə davam etdirəcək. Hökumətin əsaslandırmasına görə, Beynəlxalq Qızıl Xaç Komitəsinin yerli nümayəndəliyinin hazırkı fəaliyyətinə ehtiyac yoxdur. BQXK-nin fəaliyyətini zəruri edən səbəblər artıq aradan qalxıb.
Qeyd edək ki, Azərbaycanla Beynəlxalq Qızıl Xaç Komitəsi arasında keçmişdə də bəzi problemlər yaşanıb. Komitə 2020-ci illərin əvvəllərində Azərbaycana xəbər vermədən Xankəndidə ofis açmışdı. Həmin vaxt Azərbaycanın israrına baxmayaraq, BQXK ofisini bağlamadı. Hətta 2020-ci ildə Azərbaycanın ərazi bütövlüyü bərpa olunduqdan sonra belə Beynəlxalq Qızıl Xaç Komitəsi Xankəndidəki ofisini bağlamaqdan imtina edib. Bundan başqa, Azərbaycan tərəfində BQXK-nin humanitar missiya adı altında qaçaqmalçılıqla məşğul olması barədə faktlar var.
Millət vəkili Azər Badamov da “Sherg.az”a açıqlamasında BQXK-nın Azərbaycandakı fəaliyyətinin ədalətli və səmimi olmadığını deyib:
“Torpaqlarımız işğal altında olduğu dövrdə əsir və itkinlərlə bağlı BQXK-sinin obyektiv araşdırmalar aparıb bir fəaliyyətini müşahidə etmədik. Amma Qarabağda olmuş xunta rejiminin təminatı və separatçıların ərazilərimizdən gizli yolla çıxardılması məsələləri sərhədçilərimiz tərəfindən ifşa olunmuşdu. Həm də o vaxtı Qarabağda yaradılmış ofis İrəvandan idarə olunurdu. Təbii ki, bu, Azərbaycanın suveren hüquqlarının pozulması idi. Biz bununla bağlı dəfələrlə etirazımızı bildirsək də, BQXK-nin baş ofisindən öz hərəkətlərində bir düzəliş etdiyini müşahidə etmədik. Onda belə çıxırdı ki, BQXK ermənilər üçün birtərəfli xidmət edir və özünün neytral statusundan çıxış etmir. Bu baxımdan BQXK Azərbaycanda etimadını itirmiş oldu”.
