Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Böyük Britaniyanın Müdafiə Nazirliyində dövlət naziri Vernon Kokerlə görüşüb.
Bu barədə Azərbaycanın Birləşmiş Krallıqdakı səfiri Elin Süleymanov sosial şəbəkədə bildirib.
“Birləşmiş Krallığın Müdafiə Nazirliyində Azərbaycan Prezidentinin köməkçisini səmimi qəbul etdiyiniz üçün təşəkkür edirik, cənab nazir!” – diplomat yazıb.
Qeyd edək ki, Böyük Britaniyanın Müdafiə Nazirliyində dövlət naziri ölkənin müdafiə siyasətinin müəyyən aspektləri üçün məsul olan yüksəkprofilli siyasi vəzifəli şəxsdir. O, Müdafiə Nazirliyinin tərkibində işləyir və müdafiə nazirinə dövlət strategiyalarının həyata keçirilməsində, habelə təhlükəsizlik və müdafiə sahəsində əsas qərarların qəbul edilməsində yardımçı olur.
Xatırladaq ki, daha əvvəl Hikmət Hacıyev krallığın bir sıra yüksəkvəzifəli rəsmi şəxsləri ilə görüşmüş, Azərbaycan – Britaniya ikitərəfli əməkdaşlığının dərinləşdirilməsini müzakirə etmişdi.
Siyasi şərhçi Kazım Kazımov "Sherg.az"a deyib ki, Azərbaycan və Böyük Britaniya arasındakı münasibətlər hər zaman müsbət və strateji əməkdaşlıq ruhunda davam edib:
"Böyük Britaniya Azərbaycanın müstəqilliyini tanıyan ilk ölkələrdən biri olub və 1991-ci ilin dekabrında bunu rəsmiləşdirib. O vaxtdan bəri, xüsusilə Ulu Öndər Heydər Əliyev və Prezident İlham Əliyevin dövrlərində bu əlaqələr daha da möhkəmlənib və hazırda yüksələn xətlə inkişaf edir.
Bu əməkdaşlığın ən bariz nümunələrindən biri neft-qaz sektorunda sıx tərəfdaşlıqdır. Böyük Britaniyanın enerji şirkətləri, xüsusilə BP, Azərbaycanın enerji layihələrində mühüm rol oynayır. Eyni zamanda, COP29 tədbirləri çərçivəsində Böyük Britaniyanın Baş nazirinin Bakıya səfəri iki ölkə arasında ekoloji və enerji sahəsində əməkdaşlığın da genişləndiyini göstərir.
Bundan əlavə, bu günlərdə Prezidentin köməkçisi Hikmət Hacıyevin Böyük Britaniyaya səfəri və hərbi əməkdaşlığın genişləndirilməsinə dair aparılan müzakirələr iki ölkə arasındakı əlaqələrin təkcə iqtisadi deyil, həm də təhlükəsizlik və müdafiə sahələrində gücləndiyini nümayiş etdirir. Bütün bunlar Azərbaycanın Böyük Britaniya ilə strateji tərəfdaşlığının hərtərəfli inkişaf etdiyini bir daha təsdiqləyir".
