2030-cu ildən sonra dünyada neft tədarükünün əsas artımını OPEC+ ölkələri, o cümlədən Rusiya təmin edəcək.
Teleqraf xəbər verir ki, bunu Rusiya baş nazirinin müavini Aleksandr Novak Energy "Policy" jurnalının köşə yazısında bildirib.
Onun sözlərinə görə, neftə tələbat ən çox Hindistan və Çində artacaq. Neft istehlakında azalma ən çox Avropada olacaq. Eyni zamanda, OPEC+ ölkələrinin bazar payı 2050-ci ilə qədər 49%-dən 52%-ə qədər arta bilər.
"2030-cu ildən sonra neft tədarükünün əsas artımı Rusiyanın da daxil olduğu OPEC+ ölkələrindən gələcək. Hindistanda istehlak kəskin artacaq. Tələb 2023-cü ildəki 5,3 milyon bareldən 2050-ci ildə 13,3 milyon barelə yüksələcək", - deyə Novak qeyd edib.
Çin, digər Asiya, Yaxın Şərq və Afrika ölkələri də istehlakda lider olacaq. "Avropada neftə tələbat sutkada 13,4 milyon bareldən 9,2 milyon barelə qədər azalacaq", - baş nazirin müavini əlavə edib.
Novak qeyd edib ki, gələcəyin əsas enerji istehlakçıları Qlobal Cənub və Şərq ölkələri olacaq:
"Biz BRİKS ölkələrinin qlobal iqtisadiyyatda və qlobal ÜDM-də rolunun əhəmiyyətli dərəcədə artdığını görürük, eyni zamanda Avropa ölkələri və G7 ölkələrinin iqtisadiyyatları yavaşlayır. Bu tendensiya enerji istehlakında da proqnozlaşdırılır", - baş nazirin müavini izah edib.
O əlavə edib ki, növbəti 20 ildə ilkin enerji istehlakının artımı 20%-i keçə bilər.
