Ukrayna Silahlı Qüvvələrinin Baş Qərargahı Rusiyanın Lipetsk vilayətinin Yelets şəhərində “Enerqiya” zavodunun vurulmasını təsdiqləyib.
Teleqraf xəbər verir ki, bu barədə Ukrayna Baş Qərargahı sosial media hesabında məlumat yayıb.
Mayın 23-nə keçən gecə Ukrayna Xüsusi Əməliyyat Qüvvələrinin bölmələri “Enerqiya” zavoduna hava zərbələri endirib. Hava hücumundan sonra ərazidə silsilə partlayışlar baş verib.
Məlumata görə, “Enerqiya” Rusiyada ən böyük kimyəvi enerji mənbələri istehsalçılarından biridir. Şirkət qırıcı bombalarında quraşdırılmış planer və korreksiya modulları üçün akkumulyatorların yeganə istehsalçısıdır.
Zavod həmçinin “İsgəndər-M” raketləri üçün akkumulyatorlar, qanadlı raketlər, PUA-lar və xüsusi hərbi avadanlıqlar üçün enerji təchizatı sistemlərində istifadə olunan bir sıra universal batareyaların istehsalını təmin edir.
Ukrayna Baş Qərargahına görə, zavodun bağlanması Rusiya ordusunun bəzi hərbi texnikası və silahları üçün enerji təchizatı problemləri yarada bilər. Baş Qərargah vurğulayıb ki, Müdafiə Qüvvələri Rusiyanı Ukraynaya qarşı silahlı təcavüzünü dayandırmağa məcbur etmək üçün Rusiya Federasiyasının mühüm hərbi hədəfləri üzərində məqsədyönlü əməliyyatlarını davam etdirir.
