Gələn ay Fransa Fələstini rəsmi şəkildə dövlət kimi tanımağa hazırlaşır.
“Axios” portalının məlumatına görə, iyun ayında keçiriləcək beynəlxalq konfrans bu istiqamətdə diplomatik təşəbbüslərin koordinasiyası üçün mühüm platformaya çevrilə bilər.
Norveç, İspaniya və İrlandiyanın bu addımı atmasından sonra Fransa və Səudiyyə Ərəbistanının da eyni yolu tutması, Fələstin məsələsində qlobal dəstəyin artdığını göstərir. Lakin bu qərarlar eyni zamanda bölgədə gərginliyi də artırır və İsrailin sərt reaksiyası göstərir ki, qarşıdurmaların diplomatik müstəviyə daşınması hələ də mürəkkəb və ziddiyyətli bir prosesdir. Nəticə etibarilə, bu cür tanınmalar sülhə real töhfə verəcəksə, yalnız o zaman beynəlxalq hüququn və humanitar dəyərlərin qələbəsi kimi dəyərləndirilə bilər.
Qeyd edək ki, Fransa Prezidenti Emmanuel Makron bəyan edib ki, Paris belə bir qərar qəbul edə bilər, lakin bu, emosiyalar əsasında deyil, faydalı olacaqsa baş verəcək.
Siyasi Tədqiqatlar Mərkəzinin sektor müdiri, politoloq İlyas Hüseynov Sherg.az-a açıqlamasında bildirib ki, Fransa Fələstini tanımaqla Yaxın Şərqdə geopolitik nüfuzunu bərpa etməyə çalışır:
“HƏMAS-la İsrail arasında baş verən son münaqişə yalnız regional deyil, eyni zamanda qlobal güclərin maraqlarının toqquşduğu bir müstəviyə çevrilib. Bu prosesdə müxtəlif dövlətlər münaqişəyə müdaxilə edir və bu müdaxilələr bəzən sülhə və sabitliyə xidmət etmək əvəzinə, onların geopolitik maraqları naminə həyata keçirilən strateji addımlar kimi çıxış edir. O cümlədən də Fransa yaxın Şərqdə gedən proseslərdən narahat olduğu üçün birtərəfli qaydada addımlar atır”.
Politoloqun sözlərinə görə, Fransanın Fələstini rəsmi dövlət kimi tanımaq istiqamətindəki addımları birmənalı olaraq İsrailə qarşı yönəlmiş bir mövqedir. Fransa bu yolla, bir tərəfdən, ərəblərin çoxluq təşkil etdiyi daxili siyasi mühitini tənzimləmək, digər tərəfdən isə Yaxın Şərqdə itirdiyi mövqeləri bu formada bərpa etmək istəyir.
İsrail və ABŞ-nin hərbi-siyasi müttəfiq olduğunu xatırladan İ.Hüseynovun fikrincə, NATO alyansına üzv olan Fransa dövlətinin ABŞ və İsrailin yeritdiyi siyasəti dəstəkləməsi gözlənildiyi halda, bu qərar “qoca qitə”dəki parçalanmalardan xəbər verir. Fransada Atlantizm siyasətinin bir qədər kölgədə qaldığını vurğulayan siyasi ekspert qeyd edib ki, bu ölkə daha çox Qallizim siyasətinə üstünlük verir.
Fransanın Fələstini tanıması, politoloqun fikrincə, birbaşa olaraq Parisin müstəqil addımıdır. O, hesab edir ki, Fransanın bu qərarı ilə digər ölkələrdə ayrı-ayrı presedentlərin meydana gələcəyi ehtimalı azdır.
