Ukrayna ilə danışıqlarda iştirak etmək üçün Rusiya nümayəndə heyəti Türkiyəyə yola düşüb.
APA-nın Moskva müxbiri xəbər verir ki, Rusiya prezidentinin köməkçisi Vladimir Medinskinin rəhbərlik etdiyi nümayəndə heyəti İstanbula gedib.
Qeyd edək ki, iyunun 2-də İstanbulda Çırağan sarayında Moskva və Kiyev nümayəndə heyətləri arasında Ukrayna nizamlanması ilə bağlı danışıqlar keçiriləcək.
Xatırladaq ki, Moskva-Kiyev danışıqlarının birinci raundu mayın 16-17-də İstanbulda keçirilib.
Zelenski Ukraynanın Rusiya ilə 2 iyun danışıqlarında iştirakını təsdiqləyib
Ukrayna prezidenti Volodimir Zelenski, Ukraynanın Rusiya ilə 2 iyun tarixində İstanbulda keçiriləcək danışıqlarda iştirakını təsdiqləyib.
APA xəbər verir ki, o, bu barədə özünün Telegram kanalında məlumat verib.
“Ukrayna müdafiə nazirinin, xarici işlər nazirinin, Baş Qərargah, kəşfiyyat və Ukrayna Təhlükəsizlik Xidmətinin hesabatlarını dinlədim. İstanbulda bazar ertəsi baş tutacaq görüş öncəsi mövqelərimizi müəyyən etdim”, – deyə Zelenski bildirib.
Danışıqlarda atəşkəs və əsirlərin azad edilməsi müzakirə olunacaq
Zelenskinin sözlərinə görə, Ukrayna nümayəndə heyəti atəşkəs məsələləri, əsirlərin azad edilməsi və digər mühüm mövzuları müzakirə etməyi planlaşdırır.
“Nümayəndə heyətimizə bazar ertəsi Rustem Umerov rəhbərlik edəcək”, – deyə Zelenski vurğulayıb.
