Bakı-Naxçıvan-Bakı avtobus reysləri hər gün həyata keçirilir və sərnişin tələbatına uyğun olaraq tənzimlənir.
Bu barədə Teleqraf-ın sorğusuna cavab olaraq Azərbaycan Yerüstü Nəqliyyat Agentliyindən məlumat verilib.
Bildirilib ki, Bakı Beynəlxalq Avtovağzal Kompleksindən Naxçıvana gün ərzində saat 9:00, 19:00, 20:00 və 21:00 olmaqla 4 reys həyata keçirilir.
"Sərnişin tələbatı yarandığı təqdirdə reyslərin sayı 6-ya çatdırılır. Şərurdan isə Bakıya reyslər saat 07:00, 14:30, 15:30, 16:30-da həyata keçirilir.
Sərnişinlər biletləri onlayn qaydada “biletim.az” portalından və avtovağzalların kassalarından əldə edə bilirlər", - məlumatda deyilib.
Qeyd edək ki, bir neçə gün öncə Bakı-Naxçıvan-Bakı reysi üzrə avtobusların fəaliyyətinin dayandırıldığı haqda xəbərlər yayılmışdı.
