Qəzza əməliyyatları baş nazirin legitimliyini sual altına alır
İsrailin müdafiə elitasında və Nazirlər Kabinetində yüksək vəzifəli məmurlar Qəzza ilə bağlı əsas məsələlərdə hakimiyyət daxilində "parçalanma hissi"ndən narahatdırlar. Onlar hesab edirlər ki, qərarların qəbulundan "kənarlaşdırılırlar". İsrailin N12 kanalının məlumatına görə, Baş nazir Benyamin Netanyahu və strateji məsələlər naziri Ron Dermer qərarları dar çevrədə qəbul edib, qalan kabineti isə "kənarda saxlayıb". Ekspertlərin fikrincə, Netanyahunun davranışları İsraildə hökumət böhranının yaranmasına yol açıb.
Politoloq Zeynal Əmrəliyev Sherg.az-a bildirib ki, İsrailin Qəzza bölgəsində apardığı müharibə hökumətin reytinqində ciddi enişə səbəb olub. Ekspertə görə, bu, sadəcə taktiki deyil, eyni zamanda ideoloji fikir ayrılığıdır:
"Nəzərə alaq ki, Benyamin Netanyahunun rəhbərlik etdiyi hökumət bir-birinə ideoloji cəhətdən çox da yaxın olmayan siyasi təşkilatların koalisiyasıdır. Baş nazirin yanaşması göstərir ki, hökumətdə qərarlar konsensus əsasında deyil, fərdi siyasi maraqlarla verilir. Netanyahunun Qəzza ilə bağlı siyasətini hökumət üzvlərindən gizlətməsinin əsasən iki məqsədi var. Birincisi, hər nə qədər eyni hökumətdə təmsil olunsalar da, həmin partiyalar seçkidə baş nazirin rəqibləridir. Netanyahu seçkidə rəhbərlik etdiyi Likud Partiyasının səsinin parçalanmaması üçün sağ mərkəzin bütün təşkilatlarını nüfuzdan salmaq istəyə bilər. Baş nazirə qarşı Beynəlxalq Ədalət Məhkəməsi tərəfindən çıxarılan həbs qərarı Netanyahunu daha ehtiyatlı olmağa vadar edir. Digər önəmli məsələ İsrailin hökumət rəhbərinin prosesi tez zamanda başa çatdırmaq istəyidir. Netanyahunun istəyi "Tramp planı"na uyğun olaraq, Qəzza bölgəsindən insanları köçə məcbur etmək və orada kütləvi yəhudi yaşayış məskənləri salmaqdır".
Z.Əmrəliyev diqqətə çatdırıb ki, baş nazir siyasi ortaqlarının bu prosesə mane olacağından ehtiyat etdiyi üçün qərarları məhdud çərçivədə qəbul edir:
"Ancaq onun addımları təkcə hökumət daxilində yox, ordu ilə hökumət rəhbərliyi arasında ciddi fikir ayrılığına yol açır. Son zamanlar yayılan məlumatlara görə, İsrail ordusunun Baş Qərargah rəisi ilə Netanyahu arasında ziddiyyət yaranıb. Bu, bir ölkə üçün çox ciddi siqnaldır. İsrail kimi təhlükəsizlik yönümlü bir dövlətdə ordunun siyasi rəhbərliklə sinxron işləməməsi sistemdaxili böhranın əlamətidir. Güc strukturlarının "özbaşına qərarlar verilir" deyə narazı olması, Netanyahunun legitimliyini və idarəetmə qabiliyyətini də sual altına alır".
