Güngör Yavuzaslan: Türkiyə yeni bir indeks və təhlükəsizlik konsepsiyasına doğru yönəlib
Qlobal güc balanslarının dəyişdiyi bir vaxtda Türkiyə ənənəvi Qərb yönümlü siyasətindən kənara çıxaraq yeni ittifaqlar axtarışındadır. ABŞ və İsrailin bölgədəki siyasətlərinə qarşı narazılıq artdığı bir dönəmdə, MHP sədri Dövlət Baxçalı, Türkiyə-Rusiya-Çin (TRÇ) ittifaqının qurulmasını təklif edib. Onun sözlərinə görə, bu üçlü əməkdaşlıq yeni əsrin strateji mühitinə ən uyğun cavabdır. Bu yanaşma, Türkiyənin təhlükəsizlik və xarici siyasətində yeni bir istiqamətə doğru yönəldiyini göstərir.
Türk siyasi şərhçi Güngör Yavuzaslan Sherg.az-a Türkiyədə son günlərdə gündəmə gələn Türkiyə-Çin-Rusiya ittifaqı müzakirələrinin Cümhur İttifaqının əsas partiyalarından biri olan MHP-nin lideri Dövlət Baxçalının açıqlamaları ilə daha da aktuallaşdığını söyləyib:
"Baxçalı bu məsələ ilə bağlı “bu dəyərləndirmə Türkiyənin gündəminə gəlməlidir” deyərək ciddi bir müzakirənin əsasını qoydu. NATO üzvü olan və uzun illərdir Avropa yönümlü siyasət yürüdən Türkiyənin təhlükəsizlik sahəsində yeni axtarışlar içərisində olub-olmaması sual doğurur.
Əslində bu istiqamət dəyişikliyi Orta Şərqdəki İsrail-ABŞ əməkdaşlığının nəticəsi kimi qiymətləndirilə bilər. Terrorsuz Türkiyə strategiyasına dəstək verməyən ABŞ-nin, Suriyadakı mövqeyi və Qəzzadakı vəhşiliklər fonunda bütün regionu təhdid edən İsrailin dağıdıcı təsiri Ankaranı yeni təhlükəsizlik arxitekturası və alternativ ittifaqlar axtarışına sövq edir.
Ən son Antalyada keçirilən diplomatik forumda Rusiya Xarici İşlər naziri Sergey Lavrov dünyanın “qeyri-müəyyənlik dövrünə” daxil olduğunu, artıq çoxqütblülük və ya qütbsüzlük kimi anlayışların müzakirə mövzusuna çevrildiyini bildirdi. Yəni, nə çoxqütblü, nə də təkqütblü dünya mövcuddur, artıq dünya qütbsüz bir mərhələyə keçib".
Ekspert bu kontekstdə Türkiyənin yeni bir indeks və təhlükəsizlik konsepsiyasına doğru yönəldiyini söyləyib:
"Azərbaycanda Şuşa Bəyannaməsinə əsaslanan təhlükəsizlik modeli bu baxımdan uğurlu bir nümunə kimi çıxış edir. Türk Dövlətləri Təşkilatının lokomotivi olan Türkiyə və Azərbaycan Asiya geosiyasətində Çin və Rusiya kimi güclü dövlətlərlə əməkdaşlıq istiqamətində mühüm addımlar atırlar".
