Rusiya-Ukrayna müharibəsi yalnız döyüş meydanında deyil, eyni zamanda beynəlxalq siyasətdə də ciddi dəyişikliklərə səbəb olur. Son vaxtlar Qərb liderləri arasında, xüsusilə də ABŞ-da Ukrayna məsələsinə münasibətdə müəyyən dönüşlər müşahidə edilir. Tramp və onun ətrafının ritorikasında hiss olunan sərtləşmə, Rusiyanın diplomatik dialoqlardan çəkilməsi və Avropanın Ukraynaya verdiyi dəstək, qarşıdakı ayların həm siyasi, həm də hərbi baxımdan həlledici olacağını göstərir. Hər iki tərəf üçün zamanın əhəmiyyəti artır və vəziyyət yeni mərhələyə keçid ərəfəsindədir.
Politoloq Zaur Məmmədov Sherg.az-a Trampın mövqeyində müəyyən dəyişikliklərin müşahidə olunduğunu söyləyib:
"Bu məsələ yalnız Trampın fərdi fikirləri ilə məhdudlaşmır. Hətta onun müttəfiqlərindən biri olan Vensin son açıqlamaları göstərir ki, ABŞ rəhbərliyi Rusiyanın son addımlarından, xüsusilə də üçtərəfli və ikitərəfli görüşlərdən imtina etməsindən narazıdır. Bu narahatlıq ABŞ-nin Ukrayna ilə bağlı daha sərt qərarlar qəbul etməsinə səbəb ola bilər.
Ukrayna Prezidenti Volodimir Zelenski ABŞ-dan uzaqmənzilli Tomahawk raketlərinin verilməsini istəyib. Əgər bu raketlər Ukraynaya təhvil verilərsə və Rusiya ərazisinə zərbələr endirilərsə, bu, müharibənin gedişatına ciddi təsir göstərə bilər.
Donald Tramp BMT-də verdiyi son açıqlamasında bildirib ki, Rusiya qalib deyil, əgər qalib olsaydı, bu gün Kiyevdə olardı. Halbuki, əvvəlki çıxışlarında o, Ukraynanın qalib gəlməsinin mümkün olmadığını deyirdi. Bu mövqedəki dəyişiklik, görünür, Rusiyanın son diplomatik davranışları və Qərb ölkələrinin Ukraynaya verdiyi dəstək fonunda baş verib.
Hazırda Rusiya müharibəni dayandırmaq niyyətində deyil. Avropanın Şərqində iki böyük dövlət arasında baş verən bu müharibə yaxın gələcəkdə daha böyük və təhlükəli fəsadlara yol aça bilər. Bu, xüsusilə Polşa və Baltikyanı ölkələr üçün ciddi risklər yaradır. NATO da vəziyyətə uyğun olaraq yeni və daha sərt qərarlar qəbul edə bilər".
Ekspert Britaniya, Almaniya və Fransanın Ukraynaya verdiyi siyasi və hərbi dəstəyin Qərbi Avropa ölkələrinin bu məsələdə həmrəylik nümayiş etdirməsinə səbəb olduğunu söyləyib:
"Bu həmrəylik eyni zamanda ABŞ-nin mövqeyinə təzyiq vasitəsi kimi də başa düşülə bilər. Rusiyanın görüşlərdən imtina etməsi, Avropanın Ukraynanın yanında qətiyyətlə dayanması və ABŞ-nin diplomatik cəhətdən tək qalması göstərdi ki, Vaşinqton bu müharibədə təzyiq faktorundan daha aktiv şəkildə istifadə etməlidir.
Hazırda cəbhədə ərazilərlə bağlı demək olar ki, heç bir tərəf ciddi irəliləyiş əldə etməyib. Bu vəziyyət artıq bir neçə aydır davam edir. Lakin qarşıdan qış gəlir və hava şəraiti əməliyyatlara mane ola bilər. Bu səbəbdən yaxın vaxtlarda hər iki tərəfin yeni hücum əməliyyatlarına başlaması ehtimal edilir. Zaman məhz indi mühüm rol oynayır".
