Çexiya, Rumıniya və Sloveniya Avropa liderlərinin Parisdə keçirilən sammitinə dəvət edilmədiklərinə görə qəzəblənib. Bu barədə “Le Monde” məlumat yayıb. Çexiya hökumətindəki mənbə nəşrə açıqlamasında deyib ki, Avropanın heç bir ölkəsində Çexiyada olduğu qədər ukraynalı qaçqın yoxdur. Üstəlik, ən effektiv silah təchizatı sistemlərindən birini təşkil edən də məhz bu ölkədir. Polşanı saymasaq, müharibəyə Çexiya qədər yaxın ölkə yoxdur. Rumıniyanın müvəqqəti prezidenti İlie Boloyanın müdafiə və təhlükəsizlik üzrə müşaviri Kristian Diakonesku da ölkəsinin səylərinə baxmayaraq, Parisə dəvət edilməməsindən təəssüfləndiyini bildirib. Sloveniya Prezidenti Nataşa Pirts-Musar isə bildirib ki, Parisdəki təşkilatçıların bütün Avropa ölkələrini dəvət etməməsi AB daxilində də heç də bütün ölkələrin bərabər hesab olunmadığını göstərir. Qeyd edək ki, Fransa Prezidenti Emmanuel Makronun Parisdə çağırdığı fövqəladə toplantıya Böyük Britaniya, Almaniya, İspaniya, İtaliya, Niderland, Polşa liderləri, eləcə də Avropa Şurasının sədri Antono Koşka, Avropa Komissiyasının rəhbəri Ursula fon der Leyen və NATO Baş katibi Mark Rutte qatılmışdı.
Politoloq Zeynal Əmrəliyev “Sherg.az”a söyləyib ki, Fransa Ukrayna məsələsini öz inhisarında saxlamaq məcburiyyətindədir:
“Parisdə təşkil olunan həmin konfrans da buna hesablanmışdı. Fransa çalışır ki, Ukrayna məsələsində əsas söz sahibi olsun və gücünü Amerika Birləşmiş Ştatlarına qəbul etdirsin. Yəni Avropa Birliyinin lider ölkəsi olaraq özünü göstərmək istəyir. Fransa Avropaya liderlik etmək istəyən kimi oraya daxil olan kiçik ölkələrə gözucu baxır. Hətta rəsmi Paris cəhd göstərir ki, sözügedən ölkələrin söz haqqı olmasın. Burada Fransanın qarşısında əsas duran ölkə məhz Almaniyadır. Paris bu məsələlərdə Berlinin gücünü qəbul etməyə məcbur olub. Ancaq nəzərə almaq lazımdır ki, Almaniyada hazırda siyasi vəziyyət ürək açan deyil. Olaf Şolts höküməti artıq hakimiyyətdən gediş ərəfəsindədir. Bu ay ərzində növbədənkənar parlament seçkiləri baş tutacaq. Həmin seçkilərdə isə müxalifətdə olan xristian demokratların qalib gəlməsi gözləniləndir. Bütün bunlardan isə Emmanuel Makron istifadə etmək niyyətindədir. Fransa çalışır ki, Ər-Riyadda ABŞ və Rusiya nümayəndələrinin görüşü keçirildiyi bir ərəfədə Parisdə də belə konfrans baş tutsun. Makron düşünür ki, Ukrayna məsələsi ilə bağlı razılıq Parisdə keçirilən görüşdə reallaşacaq. Nəzərə almaq lazımdır ki, bu konfransda hansısa razılığın olmasından söhbət gedə bilməzdi. Sadəcə olaraq konfranda müəyyən məsələ barəsində söhbət etdilər. Konfransın təşkil edilməkdə məqsədi və nəticəsiylə bağlı dünyaya heç nə aydın olmadı. Çexiya, Rumıniya və Sloveniya kimi ölkələrinin görüşdən uzaqlaşdırılması Fransanın kiçik dövlətlərin söz sahibi olmasına qarşı olduğundan irəli gəlir”.
