Amma Avropanın NATO olmadan təhlükəsizlik çətiri qurması sual altındadır
Avropa İttifaqına üzv ölkələrin liderlərinin fevralın 17-də Parisdə keçiriləcək görüşü qeyri-rəsmi xarakter daşıyacaq. Bu barədə LCI telekanalı məlumat yayıb. Məlumatda deyilir ki, qeyri-rəsmi görüşdə Almaniya, Böyük Britaniya, İtaliya, Polşa, İspaniya, Niderland və Danimarkanın hökumət başçıları, həmçinin Avropa Şurası və Avropa Komissiyasının prezidentləri və NATO-nun Baş katibi iştirak edəcək. Görüşün günün ikinci yarısına planlaşdırıldığı qeyd edilir.
Beynəlxalq məsələlər üzrə ekspert Əziz Əlibəyli "Sherg.az"a bildirib ki, baş verən proseslər fonunda Avropanın gələcək hərbi təhlükəsizlik qayğıları çoxalır:
“Avropa öz üzərindən Amerikanın indiki xarici hərbi siyasətinə düzəliş etmək istəyir. Çünki Avropada geniş şəkildə fikir formalaşır ki, Amerika onları satır. Buna görə də ABŞ-yə müəyyən qədər reaksiya verməyə çalışacaqlar. Amma Avropanın NATO olmadan təhlükəsizlik çətiri qurması sual altındadır. Bunun ilkin işartılarını Böyük Britaniyanın simasında müəyyən qədər görmək mümkündür. Böyük Britaniya qeyir-NATO gücü kimi hərbi sektorunda əlaqələrini formalaşdırır. Eyni zamanda sözügedən proses Türkiyə və Böyük Britaniya münasibətlərində də büruzə verir. Lakin hazırda artan Rusiya təhdidi və zəifləyən NATO, Amerika dəstəyi qarşılığında Avropanın hərbi gücünün inşa oluna biləcəyi suallar doğurur. Ümumiyyətlə, proseslər belə ziddiyyət və qarşıdurmalar üzərindən həyata keçirilir”.
