Tehran Avropa və dünya ilə açıq müharibədənsə, danışıqların imitasiyası ilə məşğul olmalıdır
Qərb xoş niyyət göstərərsə, İran özünün nüvə proqramı ilə bağlı ədalətli danışıqları bərpa etməyə hazırdır.
Bu barədə İranın xarici işlər naziri Abbas Əraqçi Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Kaya Kallasa göndərdiyi məktubda yazıb.
"İran qarşı tərəflərin ciddilik və xoş niyyət göstərməsi, uğur şanslarına zərər verən hərəkətlərdən çəkinməsi şərti ilə ədalətli və balanslı diplomatik danışıqları bərpa etməyə hazırdır", - o bildirib.
Xatırladaq ki, İran və "Avropa Üçlüyü" nümayəndələrinin avqustun 26-da Cenevrədəki görüşü nəzərəçarpacaq irəliləyiş olmadan baş tutub.
Bu barədə "Axios"un jurnalisti Barak Devid "X" sosial şəbəkəsində yazıb.
"Axios"un fikrincə, irəliləyişin olmaması tələblərin avqustun 31-dək yerinə yetirilməyəcəyi təqdirdə Avropa ölkələrinin "Snapback" mexanizmini işə salması ehtimalını xeyli artırır.
"Snapback" 2015-ci il nüvə sazişinin bir hissəsi olan hüquqi mexanizmdir və sazişi pozarsa, BMT Təhlükəsizlik Şurasının İrana qarşı sanksiyalarına səbəb olur.
Politoloq Taleh Əliyev Sherg.az-a deyib ki, İranın ali dini liderinin Cenevrədə Avropa dövlətləri ilə keçirilən görüşdən əvvəlki açıqlaması onu göstərir ki, Tehran danışıqlardan ciddi nəticə gözləmirdi:
"Lakin görüş başa çatdıqdan sonra İranın xarici işlər naziri səviyyəsində verilən bəyanatlar Tehranın Avropa və ümumiyyətlə dünya ilə anlaşmaq cəhdinin olmadığını deyir. İran tərəfi yaxşı anlayır ki, əgər əməkdaşlıq istiqamətində danışıqlar tamamilə dayandırılarsa, bunun ardınca İrana qarşı yeni sanksiyalar dalğası işə düşəcək. Bundan sonra isə İsrailin dəstəyi ilə İran müxalifətinin və ölkədəki milli azadlıq uğrunda mübarizə aparan xalqların yenidən aktivləşməsi mümkündür. Bu proseslərin davamı olaraq isə İrana qarşı hərbi əməliyyatların başlanması ehtimalı da istisna edilmir. Məhz buna görə də Tehran Avropa və dünya ilə açıq müharibədənsə, danışıqların imitasiyası ilə məşğul olmalıdır".
