Ukrayna xarici işlər naziri Dmitri Kuleba Macarıstan xarici işlər naziri Peter Siyarto ilə görüşəcək.
APA Macarıstan mətbuatına istinadən xəbər verir ki, bu barədə Macarıstanın xarici işlər naziri Peter Siyarto monteneqrolu həmkarı ilə birgə keçirdiyi mətbuat konfransında deyib.
O bildirib ki, yanvarın 29-da Ungvarda Macarıstan-Ukrayna xarici işlər nazirlərinin görüşü baş tuta bilər və bu görüşdə nazirlər ikitərəfli əməkdaşlıq məsələlərini nəzərdən keçirəcəklər. "Mən görüşə hazıram, 29 yanvar indi, prinsipcə, hər ikimizin Ungvarda görüşməyimiz üçün nəzərdə tutulub", o deyib.
Peter Siyarto qeyd edib ki, o, Ukrayna Prezident Aparatının rəhbəri Andriy Yermakla da görüşmək istəyir, lakin qarşı tərəfdən hələlik tarix təklifi gəlməyib: "Mən görüş tarixi ilə bağlı təklifin gəlməsini gözləyirəm, sonra lazım olsa onunla görüşəcəm. Nazir Kuleba ilə kifayətdirsə, bu, əlbəttə ki, ukraynalıların daxili qərarıdır, biz buna qarışmayacağıq", Maxarıstan XİN rəhbəri əlavə edib.
Qeyd edək ki, Macarıstan və Ukrayna arasında münasibətlərdə gərginlik var. Macarıstan Aİ-nin Ukraynaya Rusiya ilə müharibədə dəstəyini tənqdi edir və bu ölkə blokun Kiyevə 50 milyard avroluq uzun müddətli maliyyə yardımını bloklayıb.
