Hollivud “ulduz”ları Ancelina Coli ilə Bred Pittin hüquqi mücadiləsində yeni qərar alınıb.
"Sherg.az” “NTV.com.tr”yə istinadən bildirir ki, “ulduz”lar arasında Fransanın cənubundakı Miraval qəsri davası davam edir. Cütlüklər qarşılıqlı şəkildə bir-birilərinə qarşı iddia irəli sürüb. Lakin məhz Ancelina Colidən bütün yazılı anlaşmaları məhkəməyə təqdim etmək tələb olunur. Bu durumun Bred Pittin lehinə olacağı da bildirilir. Bundan öncə məhkəməyə müraciətində A.Coli keçmiş həyat yoldaşının Miraval qəsrindəki şərabçılıq təsərrüfatına nəzarəti ələ keçirməyə çalışdığını iddia edərək ona qarşı milyon dollarlıq dava açmışdı. B.Pitt isə A.Colinin ona zərər vermək məqsədilə şərabçılıq təsərrüfatını əcnəbi vətəndaşa satdığını iddia edərək məhkəməyə müraciət etmişdi. A.Coli 2021-ci ildə Miraval qəsrinin şərabçılıq təsərrüfatında özünün payına düşən hissələri rusiyalı biznesmen Yuri Şeflərə satıb. İndi isə məhkəmə A.Colidən son 8 ildə imzaladığı bütün sənədləri məhkəməyə təqdim etməyi tələb edir. Aktrisanın vəkili Pol Mörfi gizli anlaşmaya dair sənədləri təqdim etməkdən məmnun olduqlarını deyib. Və sənədləri məhkəməyə təqdim edəcəklərini söyləyib. Qeyd olunur ki, Hollivud “ulduz”ları 2014-cü ildə məhz bu qəsrdə evləniblər. Daha sonra B.Pitt bu şərabçılıq təsərrüfatına rəhbərlik etməyə başlayıb.
