ABŞ Prezidenti Donald Tramp və NATO baş katibi Mark Rutte Ukrayna üçün Amerika silahlarının alınmasını birgə maliyyələşdirmək üçün Prioritetləşdirilmiş Ukrayna Tələblər Siyahısı (PURL) təşəbbüsündə iştiraka razı salmaq üçün İtaliya Baş naziri Corciya Meloniyə təzyiq edirlər.
Teleqraf xəbər verir ki, bu barədə “La Stampa” qəzeti mənbələrə istinadla məlumat yayıb.
Qəzetin yazdığına görə, Rutte İtaliyanın silah alışına cəlb olunmasında daha fəaldır, hesab edir ki, bu addım Kiyevə silah satışını stimullaşdıracaq və NATO-nu gücləndirəcək. Həmçinin, Tramp və Ukrayna Prezidenti Volodimir Zelenski də birbaşa Meloni ilə oxşar danışıqlar aparıblar. Mənbənin bildirdiyinə görə, hazırkı mərhələdə Meloni Romanın PURL təşəbbüsündə iştirakı ideyasını rədd edib.
“La Stampa” vurğulayıb ki, Meloni İtaliyanın ehtiyaclarını maliyyələşdirmək əvəzinə digər ölkələr üçün silah alınması üçün vəsait ayrılması ilə bağlı müxalifət və müttəfiqlər arasında mümkün narazılıq səbəbindən İtaliyanın PURL-ə qoşulması ilə bağlı ehtiyatlıdır.
PURL proqramı iyulun 14-də Tramp və Rutte tərəfindən başladılıb, Zelenski isə Ukraynanın tərəfdaşlarından bu təşəbbüsə aylıq ən azı 1 milyard dollar ayırmalarını istədiyini açıqlayıb.
