“Ukraynaya NATO Nizamnaməsinin kollektiv təhlükəsizliklə bağlı 5-ci maddəsinə bənzər təhlükəsizlik zəmanəti vermək ora Avropa hərbi kontingentinin göndərilməsindən daha effektiv həll yolu olacaq”.
Teleqraf xəbər verir ki, bu barədə İtaliya müdafiə naziri Quido Krozetto bildirib.
Müdafiə naziri deyib ki, hazırda zəmanətlərin verilməsi üçün iki variant var və son nəticədə ən yaxşısı seçiləcək.
“İtaliya Baş naziri Corciya Meloninin ideyası ondan ibarətdir ki, NATO müdafiə alyansı kimi təhlükəsizliyin təmin edilməsində iştirak edə bilər və bu, Ukrayna NATO üzvü olmasa da, onun müdafiəsinə zəmanət verəcək. Alternativ seçim ayrı-ayrı ölkələrin zəmanətləridir. Ən yaxşı mexanizm seçiləcək. Amma çəkindirici amil kimi NATO daha təsirlidir”, - Krozetto vurğulayıb.
İtaliya müdafiə naziri xatırladıb ki, 5-ci maddə yalnız hücum zamanı qüvvəyə minən hava, quru və dəniz müdafiəsini nəzərdə tutur. Onun sözlərinə görə, Rusiya bu variantı qəbul etsə, Avropa kontingentinin Ukraynada yerləşdirilməsindən yayınacaq.
İtaliya indiyədək Fransa Prezidenti Emmanuel Makron və Böyük Britaniya Baş naziri Kir Starmer tərəfindən irəli sürülən təklifin əksinə olaraq, öz qoşunlarını Ukraynaya göndərməkdən imtina edib. Krozetto istisna etməyib ki, bu mövqe Moskva da daxil olmaqla, razılaşmaların şərtlərinə əsasən dəyişikliklərə məruz qala bilər.
