Qazaxıstan Dezinformasiyaya qarşı Mübarizə Mərkəzi Rusiyanın Orsk şəhərinə PUA-larla hücumda iştirak etdiklərini iddia edən, ölkənin Xarici İşlər Nazirliyi və Müdafiə Nazirliyinin rəsmilərinin yer aldığı videoların saxta olduğunu açıqlayıb.
Teleqraf xəbər verir ki, bu barədə mərkəzin mətbuat xidməti məlumat yayıb.
Qurum bildirib ki, videolar “Deepfake” texnologiyasından istifadə edilməklə hazırlanıb:
“Qazaxıstan Respublikasının Xarici İşlər Nazirliyi və Müdafiə Nazirliyinin bu videolarla heç bir əlaqəsi yoxdur. Bütün rəsmi açıqlamalar yalnız təsdiqlənmiş mənbələrdə - qurumların internet saytlarında və onların təsdiqlənmiş hesablarında yerləşdirilir. Yayılan videolar informasiya təxribatıdır və yalan xəbərlərin yayılması üçün “Deepfake” texnologiyasından istifadə nümunəsidir”.
Orenburq vilayətinin qubernatoru Yevgeni Solntsevin sözlərinə görə, oktyabrın 3-də (Ukraynadan) bölgədə sənaye obyektinə PUA hücumu olub. Obyektə cüzi ziyan dəyib, istehsalatda fasilə olmayıb, tələfat yoxdur. Ümumilikdə, Orsk üzərində Rusiya hava hücumundan müdafiə qüvvələri 4 PUA məhv edib.
