Fransa Milli Assambleyası (parlamentin aşağı palatası) Mişel Barnier hökumətinə etimadsızlıq haqqında qətnamənin lehinə səs verib.
Nazirlər Kabinetinə etimadsızlıq səsverməsini 331 deputat dəstəkləyib.
Qeyd edək ki, Mişel Barnye, 1962-ci ildən bəri Fransada etimadsızlıq səbəbindən istefaya getməyə məcbur olan ilk Baş nazir olacaq.
Politoloq Asif Nərimanlı "Sherg.az"a bildirib ki, Fransada baş verənlərin, böhranın təməlində iqtisadi-siyasi vəziyyət dayanır:
"Burada kütləvi etirazlardan başlayaraq artıq məsələ siyasi müstəviyə çıxıb. Hazırda Fransa hökümətinə etimadsızlığın kökü sırf Makronun atdığı yanlış siyasi adımlardan başlayıb. Bu prosesə daha öncə Avropa Parlamentində keçirilən seçkilərdən baxmaq lazımdır. Seçkilərdə Le Penin partiyası qalib gəldi və daha çox səs topladı. Bu da uzun müddətdən sonra Fransada bir ilk idi. Makron isə Avropa Parlamentindəki seçkilərdə uduzduqdan sonra daxili vəziyyəti lehinə dəyişdirmək qərarına gəldi. Ona görə də parlamentə növbədənkənar seçkilər təyin etdi. Amma bu seçkilərdə də heç də gözlədiyi nəticəni almadı. Əksinə, Makronun partiyası daha az səs topladı, digər partiyalar ön plana çıxdı. Belə olduğu halda hökümətin təyin edilməsi məsələsində problemlər yaşanmağa başlandı. Artıq müxalif parlamentdə çoxaldıqca Makrona təzyiq etməyə başladı. Makron bu dövrdə yeni hökumət təşkil etdi. Hədəf kimi qoyuldu ki, bu hökumət iqtisadi problemləri qısa müddətdə həll etməlidir. Lakin 90 gün ərzində belə bir nəticə əldə edilmədi".
Politoloqun fikrincə, Fransadakı siyasi böhranın yaranması da Makronun təyin etdiyi Baş nazirin hökumətə böhranın həll yolu ilə bağlı təklifinə dayanır:
"Yəni onlar bu durumun həlli ilə bağlı təkliflər paketi hazırladı. Bu, parlamentdə qəbul edilmədi. Səbəb isə əslində həmin təkliflər paketinin yanlış olmasından da qaynaqlanmır. Bu öncəki seçkilərdə Makronun əleyhdarlarının daha çox səs toplamasından da irəli gəlir. Digər tərəfdən, Makron bu vəziyyətdən istifadə etdi. İndiki dövrdə ya istefa verməlidir, ya da yeni Baş nazir təyin etməlidir. Müxtəlif daha çox Makronun istefasından yanadır. İstefa verilməsi ehtimalı isə çox azdır. Güman ki, yeni Baş Nazir təyin edəcək. Amma yeni Baş Nazirin təyin edilməsi yaranmış böhranın həllini sürətləndirməyəcək. Bunun da kökündə sırf Avropa Parlamentində Makronun partiyasının məğlubiyyətindən sonra Milli Assambleyanın keçirdiyi növbədənkənar seçkilərdə də uduzmasından qaynaqlanır. Səs çoxluğu olan partiya isə az səs toplayan partiyanın nümayəndəsi olan Prezidentə təzyiq göstərir. Bu isə siyasi böhranın davamlı olacağına gətirib çıxarır. Digər tərəfdən Makronun yanlış siyasəti Fransanı yaxın müstəvidə zəif mövqeyə sürükləyir".
