Vladimir Putin Ukraynada hərbi əməliyyatlara son qoymaq üçün razılığa gəlməkdən imtina etməklə Rusiyanı məhv edir. Bunu ABŞ Prezidenti Donald Tramp deyib. Tramp bildirib ki, Putin razılaşmalıdır. Hesab edirəm ki, o, sövdələşməyə getməməklə Rusiyanı məhv edir. Rusiyanın böyük problemləri olacaq. Əksəriyyət müharibənin bir həftəyə bitəcəyini düşünürdü, amma indi üç ildir ki, davam edir.
ReAL Partiyasının sədri Natiq Cəfərli "Sherg.az"a bildirib ki, Donald Trampın bu məsələyə yanaşması ikili şantaj metodudur:
“Sözügedən metod Amerika Birləşmiş Ştatları siyasətində çoxdan bilinən, hətta Henri Kissincerin dövründən qalan siyasi gedişdir. Bu deməkdir ki, hər iki tərəfə Amerikanın təklif edə biləcəyi və təhlükə yaradacağı amillər var. Yəni Amerika Ukraynaya yardımı dayandırmaqla, Rusiyaya isə rəsmi Kiyevə dəstəyi artırmaqla basqı edə bilər. Çox güman ki, ikili şantaj metodu müəyyən nəticələrə səbəb olacaq. Onsuz da müharibər gec-tez sülh danışıqlarıyla bitir və daimi davam edən savaşlar olmur. Ona görə də düşünürəm ki, yaxın zamanlarda Tramp ilə Putin arasında telefon danışıqları olacaq. Telefon danışığı zamanı Rusiyanın qərarından asılı olaraq onu hansı təhlükənin və yaxud uğurların gözləniləcəyi açıqlanacaq. Məsələn, sanksiyaların yumşaldılması, Krım məsələsində müəyyən güzəştlərin olma ehtimalı var. Hesab edirəm ki, ikili məcburiyyət prinsipinin yaxın zamanda hansı nəticələr verə biləcəyini görəcəyik”.
