Hizbullah döyüşçüləri və İraqdakı iranyönlü şiə birləşmələr Suriyada müxalif qüvvələrə qarşı Əsəd rejiminin qüvvələrinə dəstək vermək məqsədilə onların sıralarına qoşulublar. Hazırda rejim qüvvələri ilə "Heyət Təhrir əş-Şam" arasında şiddətli döyüşlər davam edir. Bu münaqişə bölgədə gərginliyi daha da artırır və Suriyada vəziyyətin daha mürəkkəb xarakter almasına gətirib çıxarır.
Qeyd edək ki, Türkiyə Prezidenti Rəcəb Tayyib Ərdoğan Suriyada vəziyyətin gərginləşməsi fonunda Milli Təhlükəsizlik Şurasının iclasını keçirib.
Politoloq İlyas Hüseynov "Sherg.az"a açıqlamasında bildirib ki, qardaş Türkiyə Suriyada öz milli maraqlarını təmin etmək niyyətindədir:
"Prezident Ərdoğan dəfələrlə vurğulayıb ki, Türkiyənin əsas məqsədi bölgədə sülhün, sabitliyin və təhlükəsizliyin bərqərar olmasıdır. Bu çərçivədə o, hətta Bəşər Əsədlə görüş təşəbbüsü göstərmək istədiyini də bəyan edib. Lakin bu təşəbbüs bölgədəki mürəkkəb və ziddiyyətli maraqlar fonunda çox təhlükəli bir tendensiyaya işarə edir. Bölgədə müxtəlif dövlətlər və qruplaşmalar vətəndaş müharibəsindən istifadə edərək öz maraqlarını reallaşdırmağa çalışırlar.
Hər kəsə məlumdur ki, Ukraynada davam edən müharibə Rusiyanın qlobal təsir imkanlarını ciddi şəkildə zəiflədib. Bununla əlaqədar olaraq, bəzi dövlətlər Rusiyanın itirilən mövqelərini doldurmaq və öz geopolitik ambisiyalarını reallaşdırmaq üçün bölgədə fəallığını artırıblar".
Ekspert əlavə edib ki, bölgədə fəallaşan güc mərkəzlərinin rəqabəti Suriyada sabitliyi pozur və vəziyyətin daha da gərginləşməsinə səbəb olur:
"Əsas sual budur: bu rəqabət hansı istiqamətdə inkişaf edəcək və nə kimi nəticələrə gətirib çıxaracaq? Bunu zaman göstərəcək. Amma bir məsələ qətidir: bu mübarizədə qalib gələn tərəf yeni dünya nizamında daha çox söz sahibi olacaq. Türkiyə də öz milli maraqlarını təmin etmək və regional liderlik mövqeyini gücləndirmək üçün strateji yanaşma nümayiş etdirir ki, bu da onun bölgədəki təsir imkanlarını artırır".
