Respublikaçılar Partiyasından ABŞ-ın vitse-prezidentliyinə namizəd Ceyms Devid Vens ölkədə qeyri-qanuni miqrasiyaya qarşı mübarizənin bir hissəsi olaraq ABŞ-da qeyri-qanuni yaşayan 1 milyon insanın deportasiyası ilə başlamağı təklif edib.
APA xəbər verir ki, bu sözləri o ABC telekanalına müsahibəsi zamanı bildirib.
"Burada qeyri-qanuni yaşayan 20 milyon insan var. Biz real bir şeylə başlamalıyıq. Gəlin 1 milyonla başlayaq və sonra davam edə bilərik."
ABŞ-da Respublikaçılar Partiyasından prezidentliyə namizəd Donald Tramp prezident seçkilərində qalib gələrsə, ABŞ tarixində ən böyük deportasiya kampaniyasına başlayacağına söz verib.
Qeyd edək ki, miqrasiya böhranı ABŞ-da cari seçki kampaniyasının əsas məsələlərindən birinə çevrilib. Respublikaçılar faktiki olaraq demokratları miqrasiyanın kəskin artmasında günahlandırırlar.
