Rusiyanın Estoniya ilə sərhədində “Yaşıl adamlar”ın görünməsi mümkün müharibə ilə bağlı informasiya və psixoloji təzyiq üçün platforma formalaşdırmağa işarə edir.
Teleqraf xəbər verir ki, bu barədə ABŞ-nin Müharibə Araşdırmaları İnstitutu məlumat yayıb.
Amerikalı analitiklərə görə, Rusiya NATO ilə potensial qarşıdurmaya hazırlığın yeni mərhələsini başlayıb, bu mərhələ “sıfır faza” adlanır.
Oktyabrın 10-da Estoniya hökuməti sərhəd yaxınlığındakı yolu müvəqqəti bağlayıb. Estoniyalı sərhədçilər bundan əvvəl rusiyalı hərbçilərin kiçik qrupunu müşahidə ediblər, amma onların üzərində heç bir rəsmi nişan olmayıb. Estoniya Cənub Prefekturasının qubernatoru Melis Sarepunun sözlərinə görə, onlar Rusiya sərhədçiləri olmayıblar.
Estoniya xarici işlər naziri Marqus Tsaxkna bildirib ki, Rusiya qoşunları əvvəllər olduğundan daha açıq şəkildə hərəkət edirlər. Tallin gələcəkdə Rusiya ilə sərhəd bölgələrindəki yolları tam bağlamağı planlaşdırır.
ABŞ institutu vurğulayıb ki, bu, “Yaşıl adamlar”ın NATO üzvü olan bir ölkənin yaxınlığında müşahidə olunmasının ilk halıdır.
