Asiya Parlament Assambleyasının (APA) 15-ci plenar sessiyası çərçivəsində Bakı Bəyannaməsi qəbul ediləcək. Bu mühüm sənəd Assambleyanın gündəliyində duran əsas məsələləri, üzv dövlətlər arasında əməkdaşlığın genişləndirilməsini və qarşılıqlı fəaliyyətin inkişaf etdirilməsini əhatə edəcək. Bakı Bəyannaməsi Assambleyanın dəyərləri və məqsədlərinə uyğun olaraq, regional sabitlik, iqtisadi inkişaf, təhlükəsizlik və diplomatik əməkdaşlıq kimi sahələrdə birgə fəaliyyətin istiqamətlərini müəyyən edəcək. Sənəd, həmçinin üzv ölkələrin parlamentləri arasında təcrübə mübadiləsinin artırılması, qanunvericilik sahəsində inteqrasiya və Asiya ölkələrinin beynəlxalq arenada birgə səylərinin gücləndirilməsi kimi məsələləri özündə ehtiva edəcək. Bəyannamənin qəbulu APA-ya üzv dövlətlər arasında həmrəyliyin gücləndirilməsi baxımından mühüm addım olacaq. Azərbaycan paytaxtında keçirilən bu tədbir, regionun siyasi və iqtisadi gündəmində vacib rol oynayır.
Millət vəkili Vüqar Bayramov “Sherg.az”a söyləyib ki, Azərbaycan Asiya Parlament Assambleyasına ev sahibliyi və sədrlik edir:
“15-ci plenar sessiyada müzakirə edilən məsələlər həm qlobal düzən, bütövlükdə dünyada baş verən son siyasi hadisələr və bu kontekstdə Asiya dövlətlərinin, eyni zamanda parlamnetlərinin rolu ilə bağlı oldu. Müzakirələr göstərir ki, konstruktiv olaraq əksər Asiya ölkələri qlobal düzənə töhfə verməyə çalışırlar. Təbii ki, vacib məqamlardan biri də Asiya Parlament Assambleyasının bütövlükdə bəyannaməsinin qəbul edilməsi ilə bağlıdır. Çünki APA-nin bəyannaməsinin qəbul olunması Asiya Parlament Assambleyasının fəaliyyətini, eləcə də 15-ci sessiyanın nəticələrini göstərən faktorlardan biridir. Ümumiyyətlə, son illər biz Azərbaycanın parlament diplomatiyasının inkişaf etməsini və genişlənməsini müşahidə edirik. Azərbaycan parlamenti beynəlxalq təşkilatlarda aktiv olaraq təmsil olunub. O cümlədən Asiya Parlament Assambleyasına sədrlik etmək də məhz bu kontekstdə qiymətləndirilməlidir. Parlament diplomatiyasının inkişaf etməsi və genişlənməsi, təbii ki, Azərbaycan həqiqətlərinin daha böyük arenaya təqdim olunması cəhətdən önəmlidir. Xüsusilə də Azərbaycanın əldə etdiyi zəfərdən sonra regionla bağlı həqiqətlərin təqdimatı baxımından çox vacibdir”.
