Paşinyan üçtərəfli sazişə imza atıb, amma icra etmir
Zəngəzur dəhlizinə ABŞ şirkətinin nəzarət edəcəyinə dair məlumatlar yayılıb. Ermənistan xarici işlər nazirinin müavini Mnatsakan Safaryan regional kommunikasiyaların blokdan çıxarılması funksiyalarının beynəlxalq təşkilatlara verilməsi variantına münasibət bildirərkən deyib ki, bu variant Ermənistanın bəyan etdiyi prinsiplərə tam uyğun gələrsə, həyata keçirilə bilər. Onun sözlərinə görə, burada "nəzarət" sözü yanlış ifadədir: "Bu proses Ermənistanın suverenliyi, yurisdiksiyası və ərazi bütövlüyü çərçivəsində həyata keçirilməlidir. Qarşılıqlılıq təmin edilməlidir".
"Alyans" Strateji Araşdırmalar Mərkəzinin rəhbəri Abutalıb Səmədov deyib ki, Zəngəzur dəhlizi ilə bağlı Ermənistanın əvvəlki mövqeyi dəyişməz qalıb. Siyasi şərhçi bildirib ki, İrəvan hökuməti eyni yanaşma sərgiləməkdən vaz keçmir:
"Ermənistanın qayəsi odur ki, 2020-ci ilin noyabrın 10-da imzalanmış üçtərəfli bəyanatda nəzərdə tutulmuş prinsiplərdən imtina etsin. Həmin bəyannaməyə əsasən, Zəngəzur dəhlizinə Rusiya sərhədçiləri nəzarət etməlidir. İrəvan hökuməti isə bundan boyun qaçırır və məhz ona görə də "nəzarət" sözünün yanlış olduğunu bildirir. Yanlış, ya doğru olmasından asılı olmayaraq, Nikol Paşinyan üçtərəfli sazişə imza atıb. Dəhlizin açılmasını əks etdirən sənəd icra olunmalıdır. Bəyannamədə açıq qeyd olunub ki, Zəngəzur dəhlizində nəqliyyatın və sərnişinlərin maneəsiz hərəkəti təmin olunmalıdır. Ancaq başqa heç bir kommunikasiya ilə bağlı belə tələb yoxdur. Ermənistanın "qarşılıqlı prinsip" iddiası ilə çıxış etməsi doğru deyil. Zəngəzur dəhlizində bu prinsip tətbiq edilə bilməz. İrəvan hökuməti üç ildən çoxdur eyni sözləri təkrarlayır. Ermənistan ilk növbədə öz imzasına hörmət etməlidir. Əks halda Zəngəzur dəhlizinin açılması məsələsi yubana bilər. Baş nazirin bir sənədə qol çəkdiyi halda onu icra etməməsi qəbuledilməzdir".
