Elçin Xalidbəyli: Rusiya problemin mahiyyətini həll etməkdənsə, siyasi manipulyasiyalara üstünlük verir
Beynəlxalq münasibətlər sistemində etimad və şəffaflıq dövlətlərarası dialoqun əsasını təşkil edir. Xüsusilə də insan həyatı və mülki təhlükəsizliklə bağlı məsələlərdə bu prinsiplərə riayət olunması zəruridir. Təəssüf ki, bəzi hallarda böyük dövlətlərin məsuliyyətdən yayınmaq və həqiqəti gizlətmək üçün müxtəlif manipulyasiya üsullarına əl atdıqları müşahidə olunur. 2024-cü ilin dekabrında Qazaxıstanın Aktau şəhəri yaxınlığında baş verən və "Azərbaycan Hava Yolları"na məxsus sərnişin təyyarəsinin vurulması ilə nəticələnən faciə də bu cür hallardan biridir. Rusiya Xarici İşlər Nazirliyi bu hadisə ilə bağlı 1.003 milyard rubl məbləğində sığorta vəsaitinin ayrıldığını, o cümlədən xəsarət alan və həlak olanların ailələrinə 358.4 milyon rubl ödəniş edildiyini iddia etsə də, bu məlumatlar ciddi şübhə doğurur. Məsələ ilə bağlı Oxu.Az-a danışan Milli Qəhrəman Hökumə Əliyevanın atası Cəlil Alıyev Rusiyanın bu ödənişlərlə bağlı açıqlamasını təkzib edib. Bu isə rəsmi Moskvanın məsələni həll etməkdənsə, daha çox informasiya manipulyasiyasına üstünlük verdiyini göstərir.
Sherg.az-a açıqlama verən Elçin Xalidbəyli Rusiyanın verdiyi bəyanatların hər zaman manipulyasiya xarakteri daşıdığını bildirib:
"Sərnişin təyyarəsi vurulduğu zaman da Rusiya həqiqətləri gizlətmək cəhdi ilə bunu bir daha nümayiş etdirdi. Təyyarənin vurulmasını ört-basdır etmək üçün əvvəlcə onun havada quş sürüsü ilə toqquşduğunu iddia etdilər. Bu versiya inandırıcı olmadıqda isə, guya təyyarədə yanğın baş verdiyini və ya içəridən partlayışın baş verdiyini irəli sürdülər. Lakin ilkin araşdırmalar nəticəsində məlum oldu ki, təyyarəyə iki və ya daha çox raket zərbəsi endirilib. Bununla da Rusiyanın manipulyasiya cəhdləri ifşa olundu.
Rusiya Xarici İşlər Nazirliyinin verdiyi bəyanatlar da siyasi manipulyasiya xarakteri daşıyır və müəmmalı görünür. Çünki açıqlamada müəyyən maliyyə vəsaitinin ayrıldığı bildirilir, amma bu vəsaitin faktiki olaraq ödənilməsi ilə bağlı dəqiq və təsdiq olunmuş məlumat yoxdur. Həlak olanların ailələrinin reaksiyaları da göstərir ki, Rusiyanın söylədikləri reallığı əks etdirmir, əksinə, təkzib olunur. Görünən odur ki, Rusiya problemin mahiyyətini həll etməkdənsə, yenə də siyasi manipulyasiyalara üstünlük verir".
Politoloq deyilən maliyyə vəsaitləri ödənmiş olsa belə, bunun problemin tam və bir dəfəlik həll olunması anlamına gəlmədiyini bildirib:
"Rəsmi Bakının əsas gözləntisi ondan ibarətdir ki, Rusiya Azərbaycan dövlətindən və xalqından Azərbaycanın mülki sərnişin təyyarəsinin vurulmasına görə rəsmi şəkildə üzr istəsin. Bu, beynəlxalq hüquq normalarının da tələb etdiyi addımdır. Lakin nə qədər qəribə olsa da, Rusiya hələ də bu gözləntiləri qarşılamaqdan yayınır.
Bu isə onu göstərir ki, hadisə Rusiya üçün beynəlxalq əhəmiyyət kəsb etmir. Şimal qonşumuz hələ də orta əsr təfəkkürü ilə idarə olunur və dünyaya, xüsusilə də qonşu dövlətlərə qarşı bu cür yanaşma sərgiləyir. Bu isə rəsmi Moskvanın özü üçün də ciddi problemdir. Rusiyanın üzr istəməsi iki ölkə arasında münasibətlərin normallaşdırılması üçün ilkin və vacib şərtdir. Təəssüf ki, Moskva bu istiqamətdə hələlik real addımlar atmır və yenə də siyasi oyunlar oynamaqla, manipulyasiyalarla məşğuldur".
